GIPABULHOT sa defending champions Golden State Warriors ang ilang opensa sa 3rd quarter aron pagmugna og dalan paingon sa dakong kadaugan batok sa host Denver Nuggets, 127-108, kagahapon sa Natio­nal Basketball Association (NBA).

Gipangulohan ni Kevin Durant ang kadaugan pinaagi sa iyang 25 puntos, nitampo og 22 puntos si Stephen Curry samtang nidugang og 15 puntos matag usa sila si Klay Thompson ug Draymond Green.

Ang Warriors, nga ningdaog og unom sa katapusang nilang pito ka mga duwa, ningsaka sa 7-3 nga rekord.

Ang Nuggets, nga nahagsa sa 5-5 nga rekord, gipangulohan ni reserve Will Barton pinaagi sa iyang 21 puntos. Wala’y starters sa Nuggets ang nakahimo og dobleng numero nga puntos.

Igo ra nga naglabaw og lima ka mga puntos ang Warriors sa halftime apan sa 3rd quarter, nagpabuto kini’g 24-4 run aron paburuton ang ilang bintaha ngadto sa 84-59.

Wala na nakabangon ang Nuggets human niini.

GRIZZLIES 113, CLIPPERS 104

Sa Los Angeles, nagpauwan og 13 ka three-point shots ang Memphis Grizzlies aron makmakon ang host LA Clippers.

Gipangulohan ni Mike Conley ang kadaugan pinaagi sa iyang 22 puntos, nihatag og 21 puntos si Marc Gasol samtang niamot og 20 puntos si Tyreke Evans.

Ang Clippers gipangulohan ni Blake Griffin pinaagi sa iyang 30 puntos samtang nihatag og 23 puntos si Patrick Beverly.

TIMBERWOLVES 112, MAVERICKS 99

Sa Minneapolis, nagpakatap og 31 puntos ug 12 rebounds si Karl-Anthony Towns aron agakon ang host Minnesota Timberwolves sa kadaugan batok sa Dallas Mavericks.

Nidugang og 23 si Andrew Wiggins.

PISTONS 108, KINGS 99

Sa Detriot, nilangkat og 19 rebounds si Andre Drummond aron tabangan ang host Detriot Pistonss sa pagpukan sa Sacramento Kings.

Gawas sa iyang rebounds, nidugang sab og 16 puntos si Drummond alang sa Pistons nga nakakuha og 24 puntos gikan kang Avery Bradley ug 20 puntos gikan kang Tobias Harris.

PELICANS 96, BULLS 90, OT

Samtang sa Chicago, nagkinahanglan pa og overtime ang New Orleans Pelicans una nila nabuntog ang host Chicago Bulls.

Gipangulohan ni Anthony Davis ang Pelicans pinaagi sa iyang 27 puntos ug 16 rebounds samtang nitunol og 25 puntos ug 11 rebounds si DeMarcus Cousins. (AP,ESL)