MGA motorista nga moagi sa Barangay Bulacao paingon sa Barangay Tabunok, dakbayan sa Talisay gipahimangnoan sa grabeng kahuot sa trapiko.
Kini sa higayon nga masugdan na ang pagpalapad sa drainage project sa lugar nga modugtong sa Tabunok.
Si Kapitan Raul Cabañero mipasidaan sa publiko nga sabton lang una ang situwasyon sanglit temporaryo ra kini.
Matod ni Cabanero nga sugdan ang proyekto bisan unsang adlawa karong buwan sa Nobiyembre.
Nagkanayon ang kapitan nga ang proyekto mokantidad og P50 milyones ubos sa Department of Public Works and Highways pinaagi usab sa paningkamot ni First District Representative Gerald Anthony “Samsam” Gullas.
Ang Adlawan Construction maoy motrabaho sud sa unom ngadto sa walo ka buwan samtang gikan sa alas 6:00 sa buntag hangtod na sa alas 6:00 sa gabii.
Ang proyekto gitumong aron masulbad na ang baha nga nasinati sa Tabunok ug Bulacao sa higayon nga mag-uwan.
Sa higayon nga masugdan na ang proyekto, napanglantawan nga mohinay ang dagan sa mga sakyanan diha sa Bulacao ug Tabunok ug sa mga sakyanan nga nagsubay sa national highway sa N. Bacalso Ave.
Matod niya nga sila sa barangay nangandam na niini gani aduna nasilay mga pahibaw.
Apan kinahanglan nga matabangan sila sa pagpahibawo.
“Pagsabot lag ni sa mga mangagi nga traffic gyud, ayaw yawyawi ang kapitan kay naglihok man mi,” matod ni Cabanero.
Nakig-alayon na sila sa City of Talisay Traffic Operations Development Authority nga motabang sa ilang mga tanod pagdirihir sa dagan sa trapiko.
Gusto ni Cabanero nga mga tinugyanan sa Land Transportation Office maoy mobantay sa trapiko sa unang mga adlaw aron madisiplina nang daan ang mga drayber nga moagi. (DRT)