DAGKONG mga kalihokan nga pasiugdahan sa simbahang Katoliko sa nasod ang ipahigayon dinhi sa Sugbo sa 2018, tulo ka tuig sa dili pa ang dako nga kasaulogan sa ika 500 ka tuig nga anibersaryo sa pagsugod sa Kristiyanismo sa Pilipinas sa 2021.
Si Cebu Archbishop Jose Palma niingon sugod sa Enero magsunodsunod ang mahinungdanon nga mga kalihokan pipila ka adlaw human sa selebrasyon sa Sinulog.
Unang mahitabo sa Enero 22 hangtod sa 25, matod niya, ang seminar ug priestly formation nga dumalaon sa komitiba nga gikan sa Roma ug tambungan sa 400 ka mga partisipante.
Ang arsobispo namahayag nga kaniadto ang mao nga seminar adto ipahigayon sa Roma apan sa sunod tuig ang mga miyembro sa komitiba ang moanhi sa Sugbo.
Human niini, isunod ang plenary assembly sa Catholic Bishops Conference of the Philippines (CBCP) nga tambungan sa tanang mga obispo sa nasod.
Kini ang ikaduhang higayon nga dinhi sa Sugbo himuon ang plenary assembly sa mga obispo.
Sukad sa 1995, ang CBCP dunay 96 ka aktibo nga mga miyembro nga mga cardinal, archbishops ug bishops ingon man 24 ka honorary members, retirado o ni-resign nga mga obispo.
Si Palma nagkanayon nga sa Sugbo usab himuon ang national World Youth Day.
Suma pa sa arsobispo ang ubang mga seminar, mission ug dialogues nga himuon sa Sugbo ang giandam na alang sa dako nga selebrasyon sa ikalima nga sentenaryo sa pagkahimo nga Kristiyano sa Pilipinas nga nagsugod sa Sugbo.
Sa Enero sa miaging tuig, duha ka dagkong kalihokan ang gihimo sa Sugbo, ang 112th plenary session sa CBCP nga nagbukas sa mga kalihokan sa ika 51 nga International Eucharistic Congress. (SCG)