USA ka konsehal sa Barangay Tulay, lungsod sa Minglanilla nadakpan human sa pagronda sa iyang panimalay pasado alas 12:00 kagahapon sa udto, nakuhaan og mga armas ug mga bala.

Si Supt. Joie Pacito Yape, Jr., hepe sa Provincial Intelligence Branch (PIB), niila sa suspek nga si Tulay Barangay Councilor Melchor Secuya, tsirman sa komitiba sa pang­lawas sa barangay.

Nakuha gikan kang Secuya, negosyante usab og isda, ang duha ka kalibre .45 nga pistola ug walo ka mga buhi bala.

Ang ronda gipasikad sa search warrant nga giluwatan ni Talisay City Regional Trial Court Executive Judge Jacinto Fajardo.

Niuban sa operasyon ang Provincial Public Safety Company, Provincial Special Weapons and Tactics, Minglanilla Police Station ug Regio­nal Maritime Unit 7.

Gipanid-an og usa ka buwan ang mga lihok ni Secuya base gireklamo sa iyang mga sili­ngan nga magsige og pasalba sa ilang lugar.

Hinungdan nga nikuha og search warrant ang PIB sa kor­te sa dihang ilang nasuta nga tinuod ang mga pasangil sa pipila ka molupyo.

Apan si Secuya mihimakak sa pasangil nga gipahid batok kaniya.

Si Secuya niingon nga politika ang hinungdan nganong gipapriso siya ug nitudlo kang Tulay Barangay Captain Joe Romulus Laput nga maoy nagpaluyo niini.

Dihang gikuhaan og reaksiyon si Laput sa Superbalita Cebu, mihimakak sa alegasyon sa konsehal.

Si Secuya mag-atubang og reklamo nga illegal possession of firearms and ammunition sa piskaliya sa lalawigan sa Sugbo karong adlawa.