ANG bagyong Yolanda niadtong Nobiyembre 8, 2013 ug ang palpak nga pagresponde sa administrasyong Aquino kaniadtong Nobiyembre 2013 hangtod nahuman ang termino ni PNoy maoy usa ka dakong isyu batok sa iyang administrasyon.
Mao sab kini ang nakapapildi sa iyang kandidato nga si Mar Roxas sa piliay sa 2016. Ang gipili sa bagang duot labi na sa mga Yolanda sa Visayas mao si Rodrigo Roa Duterte kay gituohang action man.
Tuod man, sa ikatulong sumad sa paghapak sa Bagyong Yolanda sa miaging tuig, nimando kini dayon si Presidente Duterte og aksyon.
Ug ang iyang gimandoan mao kini si Presidential Assistant for Visayas Michael Dino. Sa miaging Agusto 2017, gihimo sab kini si OPAV Dino nga co-chairman sa Inter-Agency Task Force on Yolanda.
Napabalhin niya tuod ang kapin sa 200 ka mga Yolanda survivor sa Tacloban City. Unya, nibisita sab siya sa mga rehabilitation sites sa amihanang Sugbo.
Apan, daghan sab ang mga nangtumaw nga mga isyu sama sa mga rehab sites lakip na sa Syudad sa Tacloban nga wa pa mahuman hangtod karon.
Ang nahibudngan lang nako karong bag-o kay moingon na man ang kampo ni OPAV Dino nga wa man siyay nadawat nga sinulat nga mando gikan sa presidente.
Iya na kunong na-turn over ngadto kang Cabinet Secretary Jun Evasco ug sa National Housing Authority.
Nagpasabot ba kini nga di na siya manubag kabahin sa mga isyu nga motumaw kabahin niining dakong hisgutanan dinhi sa Kabisay-an?
Unta, kon duna may bag-ong mahuman nga mga rehabilitation site, di na unta siya mag-apil-apil pa.
Hinuon, dunay grupo ug ahensiya karon nga nitubag sa panginahanglan niining mga Yolanda survivor nga wala pa mabalhin. Atong nasabtan nga nisuroy kini sila aron magsusi sa mga kahimtang sa mga proyekto kabahin sa Yolanda.
Gani, nia sa Sugbo karong adlawa si Fr. Jose Elmer Cajilig, ang lead convenor sa Kilusang Pagbabago sa Region 6 ug si Rico Cajife, ang lead convenor sab sa Region 8 diin nahisakop ang Tacloban.
Si Cajilig ang tinubdan niadtong taho kabahin sa gibahaan nga lima ka mga barangay didto sa Bugasong, Antique nga giingon sa OPAV nga fake news. Si Cajife, sa iyang bahin, dunay mga impormasyon kabahin sa mga wala mahuman nga rehabilitation site didto sa Syudad sa Tacloban.
Atong nasabtan nga mosumiter sila sa ilang taho kabahin sa mga panghitabo sa ilang mga dapit.
Dinhi sa Sugbo, atong nasayran nga dunay maayong balita nga i-anunsyo ang National Housing Authority (NHA) karong adlawa. (@anol_cebu sa Twitter)