MATAG adlaw, makita nimo ang gagmay nga mga negusyante nga nanikaysikay sa daplin sa kadalanan.
Yano man ang ilang panginabuhi sa panan-aw sa uban, apan ang uban niini nakapatapos sa pagpatungha sa ilang mga anak uban sa sakripisyo, kugi, ug singot.
Sama kini sa magtiayong Florencio,50, ug Nancy Monceda, 48, nakapaeskwela sa ilang lima ka mga anak pinaagi sa pagpaninda og mga sud-an.
Gumikan sa ilang kan-anan, duha sa ilang mga anak nga sila si Anna Marie, 27, ug Sheila May, 25, nakahuman sa kursong Hotel and Restaurant Management (HRM) sa University of Cebu.
Ang ikatulong anak, si Clifford, 20, graduating sa kursong Psychology sa University of San Jose-Recoletos karong Marso. Samtang ang mga manghod nga sila si Jadelouise, 13, ug Venz Ian, nagtungha isip Grade 7 ug Grade 5 sa UC.
Ang kan-anan sa magtiayong Monceda ang usa sa dagsaon sa mga tawo nga gipanggutom, nga ang budget sa uban dili paigo sa mahalon nga mga restaurant.
Ang ilang kan-anan nakapuwesto sa atubangan sa usa ka establisemento daplin sa Osmeña boulevard, duol sa dalan Colon, siyudad sa Sugbo.
Sa higayong manirado na ang establisemento sa alas 6 sa gabii, ipahimutang na sa ilang unom ka mga sakop ang monobloc nga mga lingkuranan, lamesa, dagko nga mga kaldero ug ubang mga gamit sa pagluto ug dayong plastar sa lainlaing mga sud-an.
Dinhi, modagsa na og sugod ang ilang suki nga mga kustomer.
Paborito sa ilang mga suki ang lamian nga buttered chicken nga tag P15 ang buok.
Halinunon usab ang ilang tinola nga isda sa tag P40 ang matag serving, P45 ang piniritong isda, P45 ang inun-unang isda, P10 ang pancit ug P10 ang takos sa kan-ong humay o mais.
Magnapu ka tuig na sila sa ilang pwesto karong Disyembre 3.
Nagsugod sila sa pagpanuroy sa mga sud-an nga gibutang sa basket sa mga tindahan sa dan Colon, hangtod nakakita og pwesto niadtong 2007 nga maoy giukopahan nila karon.
Matag gabii, mohatag sila og P20 nga arkabala sa kagamhanan sa siyudad sa Sugbo.
Matod ni Nancy nga sukad sa sinugdananan hangtod karon, wa sila mopaumento sa presyo sa ilang buttered chicken.
Matag gabii, di mominos sa 30 kilos sa manok ang mahurot diin 12 ka mga hiwa sa manok sa matag kilo.
Nganong lami ang ilang buttered chicken?
Si Nancy niasoy tunga sa adlaw nila patuloan og tubig o duga ang lawas sa manok sa di pa i-marinate sud sa tulo ka oras gamit ang suka, patis, betsin, asin ug ginisa mix ug dayon luto.
Gawas sa manok, siya nipaambit nga dili sila magtinihik paghatag og libre nga sabaw sa mga kustomer ug maayo usab ang serbisyo sa ilang unom ka mga sakop hinungdan nga magbalikbalik ang ilang mga customer.
“Kani nga negosyo naa man dayon kita basta maningkamot lang maong nakapaeskwela mi sa among mga anak,” dugang ni Nancy, nga kutob lang sa first year college sa kursong secretarial nakatungha samtang mechanic ang kurso sa iyang bana.
Gawas nga nakapatungha sa lima ka mga anak, nakatabang usab ang magtiayong Monceda sa ilang mga silingan nga ilang gikuha isip mga kaabag sa ilang kan-anan ug modawat og P200 matag usa sa matag gabii.