TATAW’NG nadasig sa madasigong mga mensahe nga iyang nadawat sa iyang Facebook account, si ALA fighter “King” Arthur Villanueva nanumpa nga mo­bangon gikan sa iyang ka­pakyasan niadtong Doming­go sa Tijuana, Mexico.

Si Villanueva nakarehistro og knockdown sa 4th round apan nasugamak kini sa 6th round TKO nga kapildihan batok kang World Boxing Council (WBC) bantamweight champion Luis “Pantera” Ne­ry sa ilang 10-round non-title bout sa GasMart Arena.

Human ning maong kapakyasan, si Villanueva nag-post sa iyang Facebook account og mga mensahe diin mapahiubsanon niyang gidawat ang kapildihan ug iyang gi-congratulate si Nery.

Ang maong Facebook post ni Villanueva gibaha og madasigong mga komentaryo gikan sa netizens ug usa na niini ang iyang stablemate nga si International Boxing Federation (IBF) light flyweight champion Milan “El Metodico” Melindo.

“I have faith in you King. Absorb this fight as an experience to become a legend in boxing. You will know the real success if you tasted failures. May God give you more wisdom to reach your goal. Champion in heart,” mensahe ni Melindo.

“Thank you gid lan... sa­yang kaayo pero magbawi ko,” tubag nga mensahe ni Villanueva, kinsa lumad nga taga Bacolod City.

Gitambagan ni Melindo si Villanueva nga isalig ang tanan ngadto sa Kahistan-as sa iyang pagpadayon og gukod sa iyang pangandoy.

“Dali ra na. Niagi nako ana. Believe in yourself. Have faith in God and ask guidance what you need to do. Kinasingkasing nga pagtoo. And you will feel the presence of God will change your life. He will use other people as an instrument to help you. Do not rely in your own but rely all to God who give us ability to live.”

“Ayos lan, thank you gid..tandaan jud naku nah,” tubag ni Villanueva.

Si Villanueva, 28, nakaangkon sa iyang ikatulong kapildihan nga nagpatagak sa iyang rekord 31-3, 17KOs. (ESL)