DUL-AN usa ka libo ka mga pulis gipakatap sa kadalanan ning nagpadayon nga paghatag sa siguridad sa syudad sa Sugbo nunot sa nagkaduol na nga Pasko ug Bag-ong Tuig.
Gipangandaman sa Cebu City Police Office ang pagdagsang sa mga Sugboanon sa dagkong mga tindahan pinaagi sa pagpakatap og mga pulis sa kadalanan.
Matod ni Sr. Supt. Joel Doria, hepe sa kapulisan sa syudad sa Sugbo, nga nipagawas na siya og kamandoan alang sa 11 ka mga police station nga ipatuman ang hugot nga siguridad sa ilang hurisdiksyon.
Adunay kapin 1,000 ka mga pulis ang CCPO ug ang 90 posiento kinahanglan nga mogawas sa ilang buhatan aron magsilbing beat patrol nga maoy programang gipatuman ni PRO-7 Director Chief Supt. Jose Mario Espino. (AYB)