IPADAYON ni Cebu City Mayor Tomas Osmeña ang pagpabungkag sa nahabiling unom ka mga barangay tanod outpost palibot sa Carbon Complex.
Niadtong Biyenes, ang Prevention Restoration Order Beautification Enhancement (Probe) nilampos sa pagguba sa usa ka outpost duol sa Unit-III apan wa makapadayon og guba sa ikaduha sanglit nihangyo si Kapitan Felicisimo Rupinta nga ihunong kay mohangyo siya ni Osmeña.
Si Rupinta kinsa wala nitunga sa City Hall diin siya unang nibutyag nga makig-atubang siya sa mayor atol sa demolition, niingon nga kon di ipahunong sa mayor ang pagpaguba sa outpost, iyang hulipan og lamesa ug mga lingkuranan nga magsilbing outpost sa mga tanod nga mobantay para sa kahapsay ug kalinaw sa Ermita.
Ang tinuod nga rason, matod ni Osmeña, kon nganong iyang ipaguba ang mga outpost, mao nga nahimong hulga ang tanod sa lugar.
“That will push through because the tanod is really becoming the threat. They are part of the problem, they are not the solution,” matod niya.
Ang mayor nihulagway nga usa ka pangilkil ang gibuhat sa mga tanod sa mga vendor sa pagpangolekta sa tag P10 bisan kon boluntaryo pa ang paghatag sanglit ang kita sa koleksyon adto ra usab kuhaon ang sweldo sa mga tanod.
Si Osmeña supak nga maka-establisar ug makakontrolar ang mga tanod sa bisan asang dapit sa Carbon.
Matod niya nga kon adunay mga tanod nga magpundo sa giingon ni Rupinta nga lamesa ug lingkuranan, iya kining dunganon sa pagtanggal. (PAC)