USA ka filmmaking competition kalabot sa pagpanalipod sa Butuanon River gipasiugdahan sa Mandaue City Government.

Ang kompetisyon abli di lang sa mga tinun-an apan lakip na sab sa mga amateur ug professional filmmakers.

Matod ni Aracelli Barlam, pangulo sa City Environment and Natural Resources Office (Cenro), ang tema sa kompetisyon mao ang #theButuanonRiverSpeaks.

Ang genre nga dawaton sa kompetisyon mao ang documentary, docu-drama ug animation.

Napulo ka mga finalist ang kuhaon gikan sa duha ka kategorya; ang tanang finalist makadawat nang daan og P10,000.

Sa student category, ang first prize mokabat sa P55,000; second prize P45,000; third prize P25,000.

Samtang P75,000 ang premyo sa first prize sa non-student category, P55,000 sa second prize ug P35,000 sa third prize.

Duha ka mga People’s Choice awards ang pilian sa mga hurado sa pinakadaghang likes, shares ug boto online mga makadawat ug tag P15,000.

Ang deadline sa pagdawat sa entries hangtod nalang karong Nobyembre 16.

Ang mga finalist ug mga mananaog nga entries sa maong kompetisyon ipadalida atol sa International River Summit nga ipahigayon sa Mandaue Nobyembre sa sunod tuig.