ARESTADO ang asawa sa namatay nga lider sa terorista nga si Omar Maute sa Steele Makers Village, Tubod, Iligan City.

Giila ang dinakpan nga si Minhati Madrais alyas Baby kinsa usa ka Indonesian national ug giingong na-expire na ang gihuptan nga Indonesian passport.

Ang operasyon gikasa alas 9:30 sa buntag niadtong Domingo sa mga personahe sa Iligan City Police Office ug uban pang special unit sa Police Regional Office (PRO)-Northern Mindanao.

Lakip sa giaresto ang iyang unom ka mga anak diin upat niini mga babae ug duha ka mga lalaki.

Narekober sa puloy-anan ang upat ka mga blasting caps, duha ka mga detonating cords, ug usa ka time fuse.

Si Police Superintendent Lemuel Gonda, kinsa tigpamaba sa PRO-Northern Mindanao, nga ang operasyon gikasa gumikan kay taas kaayo ang level sa pagpaghulga sa terorismo sa rehiyon.

Gimando ni PRO-Northern Mindanao Director Timoteo Pacleb nga ang tanan kapolisan sa rehiyon ang mag-alerto ug mopahigayon og intensified operations batok local terrorist group (LTG).

Dugang ni Gonda nga tungod ubos pa sa martial law ang rehiyon tanan adunay kalambigitan sa terorista nga grupo ang gisunod na sa kapolisan.

Kahinumduman nga si Omar Maute, kinsa usa sa lider sa Maute group nga maoy nagsugod sa kagubot sa Marawi City, ang bag-ohay lang napatay kauban ang may kalambigitan sa Islamic State-terrorist group nga si Asnilon Hapilon.