DEAR Noy Tikyo,

Tawga lang ko og Roel, 25-anyos. Akong problema kabahin sa akong uyab karon.

"Not in good terms" mi niya karon kay grabe ang iyang kasuko nako. Hinuon gidawat man nako nga nakasala gyud ko niya, di lang makausa apan makadaghang higayon na. Sala nga nagbalik-balik lang.

Tungod niini, gusto siyang makigbuwag na nako. Apan wala ko mosugot kay nahigugma lagi ko niya. Apan unsaon man god nga tawo ra man ko, makasala gyud.

Ang problema man lang god niya kay bisan og nangayo na ko og pasaylo, di na man siya makapasaylo nako.

Inay magsige siya og sulti nga ams maayong magbuwag na lang gyud mi aron kahatagan og "space" ang among mga kaugalingon.

Pero di ko gustong magbuwag mi kay basin og hingpit na gyud hinuon siyang mawala nako, ilabi na og makakita siya og lain.

Ang nakaapan lang kay di ko makaaguwanta nga di ko siya makita ug makauban. Please tambagi, ko, Noy, kay I love him so much.

Roel

***

Roel,

Nagtuo kong love ka gihapon niya taliwala sa inyong wa pagsinabtanay karon, kay kon wa pa, hagbay ka ra niyang gibiyaan bisan pa og moingon kang di ka makigbuwag niya.

Kay kanang pagpakigbuwag sa karelasyon o uyab, basta moingon na ang usa ka party nga di na siya, di na gyud na siya, bisan pa og unsaon na nimo og gukod.

Apan tungod kay naa gihapon siyay love bisan pa og kapila na siya mosulti nimo nga magbuwag mo, aw, segurado kong nagduha-duha sab na siya nga mohimo niini.

Actually, ang buot lang gyud niyang maseguro kon ang imo bang pagpangayo og pasaylo niya matinud-anon ba. Kay nagtuo ko nga di lang ka kausa nangayo og pasaylo niya, kon di makadaghan nang higayon, sama sa imong gisulti nako.

Ang tan-aw nako sa nahitabo, magsige ka lang niya og pangayo og pasaylo, apan magsige pa sab gihapon ka og himo sa sayop nga imong gibuhat sa miaging higayon. Puriso naingon siya niini gumikan kay nakita niyang di ka matinud-anon sa imong pagpangayo og pasaylo niya.

Ang pagpangayo og pasaylo, nagpasabot og pagbag-o sab sa kaugalingon. Di lang kutob sa pangayo og pasaylo. Kinahanglan nga maningkamot ka nga makorehian ang imong pagbuhat mo og sayop. Ipakita nimo ngadto niya nga nausab ka ug naghinulsol sa imong nabuhat.

Tinuod, tawhanong lang ta, apan unta imong gipakita niya nga taliwala sa imong pagkatawhanon, makita niya nga naningkamot ka nga di na nimo mabuhat ang maong sayop. Pinaagi niini, mobalik ang iyang pagsalig ug respeto nimo.

Unya unsaon man niya pagsalig og balik nga mao ra man gihapon ang imong binuhatan? Puriso makahunahuna gyud siyang makigbuwag na lang nimo kay wala man kay gihimong kabag-ohan sa kinabuhi.

Kon tinuod kang nahigugma niya, ipakita sa imong lihok ug di lang kutob sa istorya.

Noy Tikyo