TACURONG CITY -- Gironda sa mga awtoridad ang balay sa amahan ni Mayor Randy Ecija sa Senator Ninoy Aquino, alas 7:20 sa buntag niadtong Dominggo sa probinsiya sa Sultan Kudarat.

Gibutyag ni Sultan Kudarat Police Provincial Office director, SSupt. Raul Supiter nga ilang gironda ang balay sa kanhi sundalo nga si Rodolfo Ecija nga amahan ni Mayor Ecija.

Nakuha sulod sa balay ni Ecija ang napulo ka M16 Armalite rifles, upat ka M14 rifles, duha ka Carbine rifles, usa ka caliber.30 machine gun, tulo ka kalibre .45 nga pistola, granada ug mga bala.

Gawas sa mga armas, gidakop sab ang siyam ka tawo nga giingon nga private armies sa pamilya nga Ecija.

Gikanayon ni Supiter nga dugay na nilang gipanid-an si Rodolfo nga naghupot ug mga tag-as nga matang sa armas ug mga armadong sakop. Gani nagbutang pa sila og kaugalingong detachment duol sa ilang balay.

Nakadawat sab og reklamo si Supiter nga kung makainom ang suspek magpabuto sa iyang armas resulta sa pagkalisang sa mga sibilyan.

Apan si Ecija namahayag nga mga miyembro sa Barangay Peacekeeping Action Team ang giingon sa mga pulis nga private armies ug ang ilang armas depensa batok sa New People's Army.

Hangtud karon wala pay giluwatan nga pamahayag si Mayor Ecija sa pag-raid sa mga pulis sa balay sa iyang amahan.

Giandam na sa SKPPO ang pagpasaka og kasong illegal posssession of firearms and explosives batok sa grupo ni Ecija. (Edgar E. Fuerzas)