Dear Atty. Joan,
Ako si Linda. Duna koy anak nga tres anyos pa. Giduol ko ug usa ka foreigner nga head kuno siya sa advertising firm. Nangita sila ug bata nga mo-model sa ilang produkto nga mga beer ug uban pang ilimnong pangdagko. Dako nga kantidad ang ilang i-sweldo sa akong anak apan natingala ko nganong bata ilang gusto imodel nga pantigulang man ang beer. Ingon siya nga lahi man kuno ilang beer gud kay naa kunoy kemikal nga makapabata, maong nangita sila og “baby” nga pwede ibutang sa ilang poster ug tv commercial.
Mosugot ba ko attorney?
Linda
Dear Linda,
Palihug, ayaw ug sugot. Ubos sa RA 9231 nga maoy ni-amendar sa RA 7610, walay bata ang mamahimong gamiton sa bisan unsang matang sa pahinumdum o advertisement kun diin tataw o bisan di tataw ang pag-baligya ug pagdasig sa pagamit sa mga ilimnong makahubog, tabako, sugal o bisan unsang klaseg sa pagpangabuso o di ba kaha pornograpiya.
Hinumdumi, Linda, nga walay bata nga ubos 15 anyos ang pwede patrabahuon, samot na sa mga klase nga trabaho kung diin ang bata ma-lantad sa mga sirkumstansya nga gikonsiderar sa balaod nga “worst forms of child labor.”
Kon adunay pa kamoy mga pangutana nga adunay kalabutan sa katungod sa mga bata, mahimo kamong mo-contact sa hotline 0908-896-0355.
Kini opinyon lamang nga nag-base sa inyong lakbit-saysay ug kini pwede nga mausab kun dugang pa nga mapatin-awan ang mga detalye.
Atty. Joan
(Gikan sa Children's Legal Bureau)