MAGPAKABANA kita human kuwarta natong ordinaryong kawani o molupyo ang pundo sa Social Security System (SSS) bahin sa ilang plano pagpaumento sa amotan apan walay tino nga hinungdan.
Igo lang niingon si Emmanuel Dooc, presidente ug chief executive officer sa SSS, nga ang kompaniya kinahangan nga “realistic” ug ang kita niini maayong motubo.
Unsay iyang ipasabot sa”realistic,” nabulilyaso ba ang pundo tungod sa korapsiyon ug ang masa suyopan sa pag-abuno sa kita sa ahensiya?
Sumala sa ilang plano nga 1.5 porsiyento nga umento sa contribution rate, ang mga miyembro mobayad og P15 ngadto sa P240 dugang sa kontribusyon sa ahensiya matag buwan. Naandan nga ang amotan sa SSS gibahin tali sa employer (two-third) ug employee (one-third).
Kadtong dunay suweldo nga P10,000 matag buwan mobayad og P150 nga dugang - ang P50 abagahon sa kawani ug nabilin abagahon sa employer. Kadtong dunay maximum salary credit nga P16,000 mobayad og P240 dugan sa iyang monthly contribution —ang P80 abagahon sa kawani ug ang sobra sa employer.
Ang self-employed employees bugtong moabaga sa tanan.
Ang SSS nipatuman na sa pagpaumeto sa contributions human ang “fund life” migamay tungod sa P1,000-pension hike sa 2017 ug alang sa umaabot nga P1,000-pension hike sa 2022.
Ang SSS nangayo usab og pagtugot sa Kongreso nga makapatuman sa amendments sa ilang Charter, labina sa pagsitar sa kontribusyon nga dili na mangayo og approval sa presidente? Wa nay babag sa ilang gusto?
Ang hinungdan - korapsiyon. Gani, si SSS Commissioner Jose Gabriel La Viña nibutyag nga gisugdan na ang imbestigasyon sa alegasyon sa bribery sa dili mominos upat ka mga SSS officials bahin sa stock trading controversy. Pastilan.