Mga kauban nanalipod sa suspetsadong killer

TRIPOLANTE sa mv/ Gemini, usa ka cargo nga barko nga nagbiyahian sa Madridejos, isla sa Bantayan, Cebu paingon sa Cebu City port ug vice versa, nibutyag nga atol sa pagbanhig–patay kang P01 Mae Sa­sing niadtong Oktubre 31 sa gabii, wa molakaw o mobiya si Felix Taytayan, kinsa apprentice sa barko.

Apan ang Mandaue City Police Office (MCPO) niinsister nga ang tanang mga ebidensiya nagtudlo ngadto kang Taytayan sa kamatayon ni Sasing, kinsa nadestino sa Lapu-Lapu City Police Office ug iyang kanhi hinigugma.

Gikatahong selos maoy mo­tibo sa krimen.

Si Ariel Mancio, ship captain sa mv/Gemini 10, nipahibawo sa dihang nahinabi sa sibyaanang dyAB nga si Taytayan nagsilbing ekstrador sa barko nga nitabang sa pagkarga ug diskarga sa ilang gibiyahe nga mga kargamento.

Nag-angkorahi ang barko niadtong higayona sa pantalan sa dakbayan sa Sugbo.

Diha ra si Taytayan hangtod nga mibiyahe nianang pagka alas 10:00 sa gabii niadtong Martes (Oktubre 31) paingon sa Madridejos ug alas 7:00 na sa buntag nianang pagka Nobiyembre 1 sila niabot sa maong lungsod.

Samtang si Angelo Vilches, usa sa mga tripolante ug kauban ni Taytayan niadtong higayona, nisaysay nga nianang pagka-gabii sa Oktubre 31 nanghigda sila sa teheras samtang nagpaabot nga mobiya ang ilang barko sa pantalan sa Sugbo paingon sa Madridejos.

Nagkanayon si Vilches nga gipahibawo siya ni Taytayan sa kamatayon sa iyang classmate (Criminology) base sa breaking news nga gi-post sa social media gamit ang iyang cellular phone.

“At*ya noh, gipusil akong classmate,” reaction ni Taytayan base sa saysay ni Vilches.

“Unsay sala kaha ani niya?” pangutana ni Vilches pagkahibawo sa krimen.

Butyag sab ni Vilches nga nakamatikod siya nga adunay uyab (di si Sasing) si Taytayan nga magduawan kaniya kon modunggo ang ilang barko sa Cebu City port nga giingong maghatdanan niya og maka-on.

Si Glen Cueva, kapitan sa mv/Gemini 6, sa iyang bahin, niingon nga niadtong Nobiyembre 3, sa adlaw nga gidakop si Taytayan samtang ang ilang barko nag-angkorahi sa Madridejos.

“Naa mi obra ato kay nag-taod mi og trapal. Nakita nako nga tulo ka tawo nagmotor ang nangita sa iyaha (Taytayan),” dason ni Cueva.

Nasayran ni Cueva nianang pagka-hapon nga gidala sa Cebu City si Taytayan human ni-text kaniya nga nagpahibawo nganong wa makabalik sa barko.

Samtang si SP04 Natalio Mercader, chief investigator sa MCPO nipasabot sa mga tigbalita nga ilang agdon ang desisyon sa korte human nga ilang nang napasakaan og kasong murder ang maong dinakpan.