GIINGONG tulisan sa syudad ug lalawigan sa Sugbo giingong naengkwentro sa mga sakop sa Special Weapons and Tactics (SWAT) sa Cebu City Police Office sa dihang milusad og follow operation niadtong Lunes sa gabii ang kapulisan sa barangay Lawaan 3, siyudad sa Talisay.

Apan ang pamilya giingong naalaan ang napatay kay ang igsuon niini ang nalambigit sa mga krimen.

Nakadawat og impormasyon ang Investigation and Detective Management Branch sa CCPO nga nasigpatan sa ilang balay sa Barangay Lawaan 3, syudad sa Talisay ang nagtulis ug nagpusil sa usa ka lalake nga nagkuha og kwarta sa usa ka money courier sa Barangay Carreta, dakbayan sa Sugbo, niadtong Oktubre 29.

Dali nga giadto sa IDMB sa CCPO pinangulohan ni Supt. Ryan Devaras ang lugar uban ang Special Weapons and Tactics (Swat) inabagan sa kapulisan sa syudad sa Talisay pasado alas 9 sa gabii aron dakpon si Janleomar Estudillo alyas Jan-jan.

Matod ni Devaras nga wa sila mokompyansa human mapahibawo sa ilang asset nga armado si Estudillo hinungdan nga gipauna sa pagpasulod ang mga sakop sa Swat.

Sa dihang milibot sila sa luyo sa balay niini, nakabati sila og buto sa armas gikan ni Estudillo ug dinhi na sila nibawos sa pagpabuto.

“Daghan na ni sila nga nabiktima usa pud ni sila sa suspek adtong Evangeline Aquino katong sa SM katong ila pud gipusilm dilikado jud ni sila nga grupo,” matod ni Devaras.

Nakakuha ang team ni Devaras sa posisyon ni Estudillo ang usa ka granada ug armas nga maoy gigamit sa pagpamusil.

Apan ang pamilyang Estudillo nanghimakak nga si Janleomar ang nalambigit sa pagpanulis. (AYB)