GIPANGITAAN og pamaagi sa Davao City Police Office (DCPO) ang giingong duha ka mga istasyon sa kapulisan nga taas ang kaso sa snatching.

Kini ang gibutyag ni DCPO spokesperson Ma. Theresita Plaza-Gaspan human gipatawag ang atensyon sa duha ka mga istasyon sa pulis nga mao ang Sta. Ana Police Station ug San Pedro Police Station.

Adlaw'ng Lunes gipangitaan og mga pamaagi sa DCPO ang maong hitabo sa pagpanguna ni DCPO director Senior Supt. Alexander Tagum uban sa hepe sa Sta. Ana PNP, Chief Inspector Nolan Raquid, ug ang hepe sa San Pedro PNP, Chief Inspector Ramil Macarampat.

Sumala ni Gaspan nga mas pakusgan pa ang police visibility sa duha ka mga istasyon gumikan kini nga mga istasyon ang sentro sa dakbayan.

Gipangandaman na sa kapulisan ang mga pamaagi sa pagsanta sa mga mangunguot ug manglabnihay labi na kay paduol na ang kapaskohan nga maoy panahon nga mosamot og saka ang ihap sa maong kaso.

Ang kapulisan nag-awhag sab sa katawhan nga magmabinantayon ug seguruhong anaa sa luwas kanunay ang kaugalingon ug ang mga dala nga butang kung anaa sa publiko. (JPC)