Nanghikap og lubot namusil, nakapatay

PIKIT, North Cotabato -- Patay ang duha ka mga tawo samtang duha sab ang nangasamdan human nga gipamusil sa lalaki nga nanghikap og lubot sa asawa sa usa sa namatay.

Ang insidente nahitabo alas 11:45 sa buntag niadtong adlaw nga Lunes.

Giila ang mga namatay nga sila Sammy Emba, molupyo sa Barangay Pagagawan, Datu Montawal, Maguindanao Province ug Hamsa Pagayao, nagpuyo sa Barangay Nalapaan, Pikit.

Samtang ang naangol mao sila Rahima Emba, asawa ni Sammy, ug si Alagasi Budtong.

Gitaho ni Pikit Cotabato chief of police Chief Inspector Romy Castanares nga namalit sila si Sammy ug Rahima og second hand nga cellphone sulod sa merkado publiko sa Barangay Poblacion, Pikit.

Apan kalit lang nagkalalis sila si Rahima ug ang suspek nga si Abdulnasser Alamanza Malimbato gumikan matud pa sa pagpanghikap niini sa lubot sa nahiuna.

Tungod sa kasuko ni Sammy nga gihikap ang lubot sa iyang asawa, nagkasinumbagay sila sa suspek.

Mitabang sab ang mga kaila sa magtiayon nga sila Budtong ug Pagayao diin ilang gitabangan si Malimbato.

Sa diha nga nalup-og na ang suspek, kalit kining mihulbot sa iyang armas nga kalibre .45 na pistola ug gipamusil ang mga biktima.

Abtik sab nga nagresponde ang mga sakop sa Pikit Municipal Police Station, Cotabato Police Public Safety Company (CPPSC) ug 2nd Company sa Regional Police Office-Soccsksargen Regional Public Safety Battalion (RPSB) ug nadakpan si Malimbato.

Mga naangol gipangdala sa Cruzado Medical Hospital apan nabugtoan sa kinabuhi sila Sammy ug Pagayao.

Nangatarungan ang suspek nga wala niya tuyoa nga mahikapan ang lubot ni Rahima, aksidente lamang kining nasaghiran sa iyang kamot.

Ang kapulisan sa Pikit MPS padayon nga nagsusi sa insidente.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph