DILI angayan manghambog ang kapulisan sa dakbayan sa Mandaue City nga sulbad na ang kaso sa pagpatay ni PO1 Mae Sasing gumikan kay na-ilhan na, nadakpan ug napasakaan na og kaso ang mamumuno. Si Felix Taytayan ang gi-konsiderar nga maoy utok sa pagpatay sa policewoman gumikan sa matod pa naghigwa-os nga gugma niini ngadto ni Sasing. Adunay relasyon ang duha sa dihang nagtungha pa sila kolehiyo.
Matod sa kapulisan nga lig-on ang ilang mga ebidensiya nga nagtumbok kang Taytayan nga mao mismo ang naghimo sa maong krimen. Matod pa nga may saksi ang kapulisan nga nakakita personal kang Taytayan nga maoy nagpusil kang Sasing sakay sa motorsiklo niadtong Oktubre 31 sa gabii sa Basak, Mandaue City.
“Crime of passion,” matod pa sa kapulisan. Managhinigugmaay silang Taytayan ug Sasing kaniadto sa dihang nagtungha pa sila sa koliheyo. Apan wala sila magkadayon. Human sa 10 ka tuig, nagkita pag-usab sila. Mi-inister si Taytayan ngadto ni Sasing nga ilang sumpayan ang ilang naputol nga kagahapon. Apan magdumili na ang policewoman gumikan kay aduna nay laing binuhat sa iyang kinabuhi ug gani aduna na silay anak. Wala pa hinuon sila makasal.
Samtang mao kini ang bersiyon sa kapulisan, mitumaw karon ang kontrobersiya gumikan kay ang mga kauban ni Taytayan sa barko diin siya nag-apprentice mi-insister man nga niadtong oras nga gipatay si Sasing, diha ra sa sulod sa barko si Taytayan. Bisan ang kapitan sa maong barko, Gemini 10, mi-insiter nga wala monaog sa barko si Taytayan kay daghan silang kargamento nga gidiskarga. Matod pa ni Capt. Ariel Mancio nga siya mismo nakakita kang Taytayan sulod sa barko hangtod sila milabigar sila nianang gabii pa-ingon sa Madridijos.
Kinsa man kaha ang angayan tuhuon sa husgado kon maabot na kining maong kaso sa korte? Daghang mga kaso nga sa sinugdanan mohusgar na kita nga ang akusado mao na ang naghimo sa krimen apan ma-absuwelto diay gumikan sa kahuyang sa mga ebidensiya sa kapulisan ug prosecution. (bobbygnalzaro@gmail.com)