NAGKAKUSOG ang hugonhugon nga adunay tanyag ang GlobalPort Batang Pier sa teams nga interesadong mokuha sa ilang pambatong pointguard nga si Terrence Romeo.
Nakumpirma sa Spin.ph nga nangita na og ikasabot ang GlobalPort human mismong si Romeo ang mihangyo kanila nga ibalhin kini og laing team pinaagi sa trade.
Una kining gikataho ni Musong Castillo sa The Inquirer.
Giingon nga adunay negusasyon aron ibalhin si Romeo sa Meralco Bolts baylo nila ni Baser Amer ug Chris Newsome apan matod sa team insiders nga wala pa kini ma-finalize.
“Wala pa ‘yan,” asoy sa GlobalPort insider sa interbyu sa Spin.ph.
Matod pa nga nagduhaduha ang Meralco nga modawat sa tanyag sa GlobalPort gumikan kay dili kini uyon nga buhian si Newsome.
Asoy sa mga tinubdan, ang produkto sa Far Eastern University (FEU) Tamaraws nihangyo na niini niadto pang Commissioner’s Cup sa Philippine Basketball Association (PBA).
Si Romeo, kinsa gipili sa GlobalPort Batang Pier isip No.5 overall pick niadtong 2013 rookie draft, usa na sa labing bantugang magduduwa sa liga apan sulod sa upat ka seasons, wala pa kini nakatilaw og kalampusan.
Bisan pagpatong sa finals sa PBA wala pa sukad naabot ni Romeo ubos sa kampo sa Batang Pier. Ang labing taas niyang natungtongan mao ang semi-finals ug ka usa ra sab kini nahitabo.
Ang labing maayong nahitabo alang kang Romeo iyang nasinati dihang nagduwa siya sa Gilas Pilipinas sa Fiba Asia Cup sa China niadtong 2015 ug Lebanon ning tuiga.
Gumikan sa maayo niyang gipakita ning maong mga torneyo, si Romeo nabantog na sab sa ubang mga dapit sa Asya.
Gani gikuha siyang endorser sa Peak nga sapatos nga nagbasi China.
Sa sayo pa, misuway ang GlobalPort pagtanyag kang Romeo ngadto sa Talk N’ Text KaTropa baylo kang Tautuaa apan wala sab mosanong ang KaTropa. (ESL)