NAGPA-UWAN og three-point shots ang host San Antonio Spurs aron makmakon ang Los Angeles Clippers, 120-107, kagahapon sa National Basketball Association (NBA).

Sa kinatibuk-ang duwa, grabe ang pinasahay sa Spurs hinungdan nga nakalugar ang ilang mga tirador sa gawas sa pagmugna og 15 ka three-point shots, labing daghan ning maong season.

"We had 33 assists, which is a great unselfish game, really good. A lot of people participated. Making shots does make things simpler," matod ni Spurs coach Gregg Popovich.

"The ball moved, our pace was better, but our defense still needs to get better. That will take some time with all the new guys and the combinations that are out there right now."

Ang Spurs, nga ningsaka sa 7-4 nga rekord, gipangulohan ni LaMarcus Aldridge pinaagi sa iyang 25 puntos, nidugang og 24 puntos si Danny Green, niamot og 22 puntos si Rudy Gay samtang niamot og 19 puntos si Pau Gasol.

Sila si Green ug Gay ang nanginit sa three-point area alang sa Spurs. Nakamugna sila og tag upat ka three-point shots matag usa.

Sama sa miagi nilang duwa, ningdomina na sab ang Spurs sa 3rd quarter diin 40 puntos ang ilang napupo nga puntos.

"Because of the way the first half went, it was a winnable game for both teams," asoy ni Clippers coach Doc Rivers. "But the difference was they came out and executed the same way in the second half on both ends and we didn’t."

Ang Clippers, nga nahagbong sa 5-5 nga rekord, gipangulohan ni Austin Rivers pinaagi sa iyang 24 puntos samtang nihatag og 15 puntos si Blake Griffin.

Sa laing gikaintapang duwa, ang Cleveland Cavaliers nakaipsot sa kamangtas sa pambato sa Milwaukee Bucks nga si Giannis Antetokounmpo aron iposte ang 124-119 nga kadaugan.

Gamangtas si Antetokounmpo ug nagpakatap kini’g 40 puntos apan napuhalan kini sa season-high 32 puntos ni Kevin Love ug 30 puntos ni LeBron James.

Ang Cavaliers ningsaka sa 5-6 nga rekord samtang ang Bucks natagak sa 4-6 nga rekord.

Sa laing mga duwa, ningdaog ang New York Knicks batok sa Charlotte Hornets, 118-113, New Orleans Pelicans batok Indiana Pacers, 117-112, Dallas Mavericks batok Washington Wizards, 113-99, Sacramento Kings batok Oklahoma City Thunder, 94-86, Toronto Raptors batok Chicago Bulls, 119-114, Denver Nuggets batok Brooklyn Nets, 112-104, Philadelphia 76ers batok Utah Jazz, 104-97, ug Memphis Grizzlies batok Portland Trail Blazers, 98-97. (AP, ESL)