TULO ka mga beauticians ang nasikop sa Philippine Drug Enforcement Agency (PDEA)-Davao atol sa gilusad nga buy-bust operation alas 3:40 kagahapon sa kaadlawon, Miyerkules, didto sa Purok 8, Baragay Poblacion, Nabunturan, Compostela Valley Province.
Ang mga dinakpan nailhang sila Jaynil Lomactod Ignacio, alyas Jaynil, 31; John Paul Alvoro Bandi, alyas Paula, 19; ug Raphael Corales, alyas Ashly, 19, pulos nagpuyo sa nahisgutang lugar.
Nasikop ang mga dinakpan human nakig-transaksyon sa nagtakuban nga pulis aron mobaligya og shabu.
Dihang gidawat na ang marked money, gilayong gisikop ang tulo ug nakuha sa ilang posesyon ang usa ka pakite sa gituohang shabu, P1,000 nga marked money ug ang ilang gisakyan nga Toyota BB.
Samtang, sa laing operasyon sikop ang usa ka Marlou Realto Raz, alyas Dodong, 20, traysikad drayber, kinsa nasikop alas 6:30 sa gabii niadtong Martes didto sa Sta. Cruz, Tancontian, Barangay Duterte, Agdao District, Davao City.
Usa ka pakite sa shabu ug marked money nga P1,000 ang nakuha kaniya.
Kasong pagsupak sa Republic Act 9165 kon Comprehensive Dangerous Drugs Act of 2002 ang ipasaka nga kaso sa mga dinakpan.