MISIS nga nagpaabot sa iyang bana gitulis, kapin sa usa ka gatos ka libo ka pesos ang nadala sa mga tulisan duol sa Barangay Hall sa Lawaan 2, dakbayan sa Talisay niadtong Martes sa alas 11:15 sa gabii.
Sigun sa taho sa Talisay Police Station ang biktima giila nga si Airene Nerez, hamtong, minyo ug nagpuyo sa H32 South City Haomes Uldog, Barangay Cansojong.
Ang biktima gikathao nga nagbarog sa nahisgutang lugar kay nagpaabot sa iyang bana nga maoy mukuha kaniya.
Apan tulo ka mga lalaki nga nagsakay og motorsiklo ang nihunong ug ang duha ka backrider ang ninaug ug niduol kaniya.
Matod pa sa biktima nga ang usa sa mga backrider ang nibunot ug wa matino nga armas dayon nideklarar og tulis ug dayo'g labnot sa iyang bag nga dunay sulod P20 mil nga salapi, wedding ring, gold ring, mga mahalong cellphones nga tanan nikantidad tanan og P179 mil.
Ang biktima nga nakalitan sa hitabo ug gibati ang tumang kahadlok wala na mopakita og pagsukol human siya siyagiti sa suspek nga kun dili ihatag ang iyang bag hayan pusilon siya.
Sa pagkakaron, ang kapulisan sa Talisay padayon pa hinuon ang follow-up operation aron mailhan ang mga responsabli, masikop ug mapasakaan og kaso. (DRT)