GIHAWOD ni Vince Angelo Medina sa Laguna ang 2nd Mayor Jojo Palma and Atty. Titing Albano Rapid Open Chess Tournament niadtong Domingo sa AIMCOOP Building, Aurora, Zamboanga del Sur.
Kini, human giparot ni Medina ang Kagay-anong si Jaime Joshua A. Frias II sa usa ka Trompowsky Opening nga panagsangka sa kataposang siyam nga round.
Nihuman si Medina og walo ka puntos ug solong naangkon ang Php 30,000 nga cash prize ug trophy.
Sila National Masters David Elorta ug Henry Roger Lopez milanding sa ika-duha ug ika-tulo nga pwesto, sunod-sunod, nga parehas adunay 7.5 puntos matag usa.
Natabla ni Elorta, taga Manila, ang iyang dula kang NM Rustum Tolentino sa kataposang round, samtang giparot ni Lopez sa Panabo City ang iyang kababayan nga si Jason Salubre.
Gibitbit ni Elorta ang P20,000 second place cash prize, samtang niuli si Lopez og P10,000.
Nabugkos si Grand Master Darwin Laylo sa ikaupat paingon sa ikawalo nga pwesto nila Tolentino, NM Levi Mercado, NM Joey Albert Florendo ug Alfredo Rapanot.
Apan, solong naangkon ni Laylo ang ikaupat nga pwesto tungod sa superior nga tie-break points.
Nilanding sab sila Christopher Randolph Dalauta ug Frias sa ikasiyam ug ikanapulo, sunodsunod, nga adunay 6.5 points matag usa.