GISUGPO sa IAM 98 cagers ang taas nga bangongot human giparot nila ang Alumni 1993, 60-43, atol sa 8th XUHS-ABA Basketball Tournament niadtong Biyernes sa Xavier University Main Campus covered courts.
Nagkalayo si Abelou Sanchez sa opensiba sa IAM 98 agi pagkulit og 17 puntos aron putlon ang walo ka sunodsunod nga kapildehan.
Nakakuha og dakong abag si Sanchez nila Ryan Yacapin, Milber Alinas, Mike Daming ug Reagan “XU Sakuragi” Abbu.
“We needed to bounce back somehow despite lacking key members in the team,” ingon team manager John Victor Ocampo.
Mao ning ang ika-duhang kadaogan sa IAM 98 sulod sa 12 ka dulaan ug pabilin sila sa kataposang pwesto sa St. Peter Faber Cup division.
Gikinahanglan nila nga maharus ang nabiling lima ka dula aron malantaw ang ilang tsansa nga makasulod sa top-4 playoffs sa division.
Ang Batch 1993 sa pikas bahin naa sab sa kataposang pwesto sa St. Francis Xavier Cup division nga anaay 3-9 win-loss card.
Sa uban nga dula, nihuman si Elich Alfante og dako nga 26 puntos aron sakwaton ang iyang Alumni 1996 ngadto sa 76-66 nga daug batok sa 1992.
Nilambo ang 96ers ngadto sa 4-9 record sa ikalima nga pwesto sa Faber Cup ug hingpit naglakag sa 1999 nga anaay 5-8.
“Paningkamotan namo nga sulod mi sa top-4,” ingon ni Alfante.
Nipupo sab si Renato Nacalaban og 14 ka marka ug tayming ang iyang presensya aron mangulo sa 58-50 nga daug sa iyang Batch 2002 kontra sa 2006.
Samtang, gipukan sab sa XUHS 2000 ang Spartans 9, 55-45.