NABALAKA karon si Misamis Oriental Governor Yevgeny Vincente Emano sa Philippine Drug Enforcement Agency (PDEA) nga mao na lamang nag-inusarang makigbatok sa ginadili nga druga human gimando ni Presidente Rodrigo Duterte nga dili manginlabot ang Philippine National Police (PNP) niini.
Pasabot ni Emano nga ang pakigbatok niini gikahanglan pag-ayo ang PNP ug tungod niini, iyang gipanawagan ngadto kang Presidente Rodrigo Duterte nga ibalik ang katungod sa mga polis nga pakigbatokan ang ginadili nga druga.
“I wish the President will activate again the PNP in his war against drugs. Nabalaka kita basin ug mobalik pagtaas ang supply and demand. Iyang nasugdan basin dili ma-sustain. Dili ako uyon isalig tanan sa PDEA tungod kulang gayud sila sa pwersa. But cases should continue if they feel nayatakan ang ilang tawhanong katungod,” matud sa Gobernador.
Nagtuo usab ang gobernador nga ang pwersa sa PDEA daw wala mikatunga kon itandi sa pwersa sa kapolisan.
“Gigamit na gani tanan entiro pwersa sa police, NBI (National Bureau of Investigation), CIDU (Criminal Investigations and Detection Units), drugs enforcement units, and the Philippine Army (PA), naa pa gani gihapon, samot karon kung kuhaon sila sa kampanya batok ginadiling droga.” Matud pa niini.
Hinuon daw wala siya kwestyon sa kapasidad sa PDEA sa paghimo niini sa ilang tahas apan sa kampanya nga susama niin gikinahanglan ang pagtinabanga sa mga law enforcement unit.
“No mistakes, PDEA is doing its best. But in whatever campaign, all these enforcement agencies have to combine their forces to totally end this menace of our society. That’s why I’m calling President Duterte to reactivate the PNP in this particular campaign,” panapos sa gobernador.