MAOY naandan sa mga Pinoy ang pagtukod og mga payag aron kapasilungan kon mag-uwan o kon init kaayo ang adlaw. Kadtong gi-atupan og nipa gitawag sa Iningles nga nipa hut.

Dunay kanta sa Tinagalog nga “Bahay Kubo.” Pero wa kini maghulagway sa payag kay ang gihisgutan mao na man hinuon ang nagkalain-laing mga tanom sa palibot niini.

Sa daplin sa mga daruhan sagad  makita ang mga lagkaw, payag nga way bungbong ug maglapus-lapos lang ang hangin. Mao kini ang pasilungan sa mga mag-uuma gikan sa naglagiting nga kainit sa adlaw.

● ● ●

Pero ang  atong hisgotan mao ang mga payag nga tukuron unta sa Philippine Marines didto sa Sandy Cay, usa ka gamay kaayong sandbar sa South China Sea nga giilogan sa daghang mga nasod, lakip na ang Pilipinas ug China.

Ang maong mga payag himuon untang pasilunganan sa mga Pilipinong mangingisda ug sa pamilya sa mga Pinoy nga tua na magpuyo sa Pag-asa Island sa gitawag nga Spratlys.

Ang maong sandbar may gidak-on nga 500 metro kuwadrado ug nahimutang 4.6 kilometros gikan sa Pag-asa Island, usa sa mga dagkong isla nga okupado sa Pilipinas.

● ● ●

Apan gipahunong ni Presidente Rody Duterte ang pag­tukod sa maong mga payag kay niprotesta ang China, matod pa ni Defense Secretary Delfin Lorenzana.

Matod pa ni Lorenzana, dunay kasabutan ang Pilipinas ug ang China alang sa usa ka moratorium sa pagtukod og mga structure ug pag-okupar og mga terituryo sa maong dapit.

Mao na nga ang Pilipinas di makatukod og bisan payag na lang didto sa Sandy Cay. Payag ra gyud unta ang kayang tukuron sa Pilipinas.

● ● ●

Mas maayo na karon ang relasyon tali sa Pilipinas ug China human molingkod sa puwesto si Presidente Du­terte.

Manghinaut kita nga makab-ot ang usa ka malinawing solusyon sa South China Sea.

Ang maong hitabo nagpakita nga ang Pilipinas di makatukod og payag apan ang China siging himo og mga isla sa South China Sea nga gitawag nato nga West Philippine Sea.