SOBRA gyud siguro ka bilib si Gov. Junjun Davide aning Baltazar Tribunalo gumikan kay iya mang gihatagan og duha ka posisyon diha sa Kapitolyo. Si Tribunalo maoy hepe sa Provincial Disaster Risk Reduction and Management Office (PDRRMO) ug officer-in-charge sa Provincial Environment and Natural Resource Office (Penro). Gitudlo siya isip OIC sa Penro human mi-resign ang kanhi hepe nga si Atty. Chad Estilla niadtong miaging tuig.
Aw, dili usab kita makabasol aning Tribunalo nga midawat sa maong mga posisyon kay ang gobernador man maoy nagtudlo kaniya. Wala man pod siya magdawat og suweldo sa duha ka posisyon kay kalapasan man kana sa polisiya sa double compensation sa gobiyerno. Siguro nagdawat siya og allowance isip Penro chief. Wala na ba gyuy laing matudlo sa usa puwesto ang gobernador?
Apan dili kana maoy isyu. Ang isyu mao ang panguwarta ni Tribunalo diha sa iyang buhatan. Isip hepe sa PDRRMO, nag-sige siya og request og pamalit og mga disaster equipment bisan ug dili importante ug posible nga overpriced. Kadtong nalunod nga speed boat diha sa kadagatan sa Talisay City usa to sa iyang mga gipamalit. Nahibawo naman mo aning mga suppliers mohatag man gyud na sila og komisyon. Ang uban mga ekipos nangalata lang diha sa ilang buhatan.
Isip Penro chief, kini si Tribunalo manigbas ngadto sa mga sand and gravel haulers. Gani miangkon siya nga adunay mihatag og duha ka air units ug usa ka dako nga flat TV screen. Nabuking ni sa dihang na-deliver ngadto sa iyang buhatan inay ngadto sa iyang panimalay sa Balamban.
Dili ba kalapasan man sa balaod sa anti-graft ug sa ethiĀcal standards sa mga opisyal sa kagamhanan ang mangayo o modawat og donasyon gikan sa pribadong individual labi pa kon ang maong tawo adunay transaksiyon sa buhatan sa kagamhanan? Ang naghatag anang maong mga butang nga gidawat ni Tribunalo nag-negosyo ug sand and gravel hauling. Ang Penro maoy mo-isyu ug permit aning mga hauler. Wala gyuy uwaw uy.
(bobbygnalzaro@gmail.com)