PANTUKAN, Comval Province - Duha ka managlahing engkwentro tali militar ug rebeldeng grupo human nadawat ang taho gikan sa nagpakabana nga katawhan sa Pantukan nangilkil ug nangrekrut ang New People's Army (NPA) sa Sitio Sarayon, Barangay Araibo sa maong lungsod.

Suma sa 10th Infantry Division sa Philippine Army, alas 11:00 sa buntag niadtong Miyerkules, usa ka platoon sa 66th Infantry Battalion ang gipadala aron kompirmahon ang report nga miresulta sa pinusilay.

Ang militar nagkanayon nga mokabat sa 30 ka rebelde nga gidudahang sakop sa Section Committee18 sa Southern Mindanao Regional Committee (SMRC) ug Pulang Bagani Command 6 ang ilang naengkwentro.

Bisan pa sa presensya sa ilang labaw nga lider, ang mga rebelde daling misibat paingon sa bukiron nga bahin sa lugar.

Ala 1:30 sa hapon sa samang adlaw, laing Platoon ang gitahasan nga maglusad og operasyon sa lugar nga miresulta sab sa pinusilay didto sa Sitio Sarayon, Barangay Araibo, Pantukan.

Ang platoon nangayo dayon og Close Air Support samtang ang Field Artillery Battalion miayuda sab nga miresulta sa pagpanagan sa mga rebelde.

Ang binakbakay mikabat sa usa ka oras ug napulo ka minuto nga miresulta sa pagkasamad sa mga NPA base sa mga dugo nga nakita sa dapit.

Narekober sa militar ang 12 ka bag sa Improvised Explosive Device (IED) component ug wires.

Si Maj. Gen. Noel Clement, 10ID Commander, nagkanayon nga: "We are sending a message to the NPAs that full force of the government will be utilized if they still continue on conducting atrocities, extortion, harassments and recruitment in our areas of responsibility."