Super Suroy: ORP, nature trek destinasyon sa Sugbo

KON gusto nimo magpabug­­naw ug sa samang higayon makat-on sa imong palibot, adunay lugar nga haom sa imong gipangita.

Di layo gikan sa siyudad sa Sugbo, nahimutang ang man-made forest sa Barangay Camp 7, lungsod sa Minglanilla.

Pinaagi sa Act No. 2649, gigahin ang P10,000 alang sa reforestation project nga gipaluyohan ni anhing Presidente Ser­gio Osmeña Sr., hinungdan gipa­nganlan ang lasang og Osmeña Reforestation Project (ORP).

Ang ORP ang nag-una ug labing karaan nga reforestation project sa nasod nga nagsugod niadtong Enero 13, 1916.

Sud sa 2,710 ektarya nga gidak-on sa lasang, makita ang higante ug tag-as nga mga kla­se sa punoan sa kahoy nga nagha­tag og landong sa palibot.

Si Samuel dela Cruz, in-charge sa Clonal Nursery nga maoy nagtuon ug nagpasanay sa mga punoan sa kahoy, nii­ngon makit-an sud sa ORP ang mga punoan sa kahoy sama sa tuog, ang labing taas nga kahoy sa Pilipinas; almasiga; lawaan; mahogany; tagi lumboy; acacia; falcata; narra; palm flamboyant, tugas; eucalyptus; ug uban pa.

Matod ni dela Cruz 40 porsiyento sa mga punoan sa kahoy sa ORP mga Mahogany.

May mga klase sa kawayan usab nga nagbarog sud sa 12 nga ektarya sa lasang sama sa giant bamboo, bolo, kiling, tinik, bayog ug bagakay.

Duna usab mga tanom ug klase sa mga buwak ang nanubo usab sa lasang sama sa wild orchids ug walingwaling ingon man pili nuts ug marang.

Anaa usab sa lasang ang mga mananap sama sa mga langgam nga Cebu Black Shama, Ce­bu Hawk Owl, alimukon, ku­si (parrot nga gagmay) ug ubang endemic nga mga nilalang.

Gawas sa mga langgam, matod ni Anita Oro, tig-atiman sa mga buwak ug tanom sa nur­sery, makita usab sa ORP ang lainlaing mga klase sa alibangbang sama sa bulimia, orange tip ug daidalos.

“Dinhi, dili lang ka ma-relax, makat-on usab ka unya duol ra siya sa siyudad,” pamulong ni dela Cruz.

Ang Clonal Nursery ang nag­­­silbi nga demonstration, training, laboratory testing ug storage center sa mga liso ug tanom nga gipatubo ug gi-clone nga gigamit sa pagpasa­nay sa mga punoan sa kahoy.

Mahibaw-an nimo kon duol na ka sa dapit kon maaninaw na nimo ang higante nga mga punoan sa kahoy nga nagbarog sa mga daplin sa karsada nga sama og naa ka sa Baguio City.

Ang destinasyon sama sa man-made forest sa lalawigan sa Bohol, nga naa sa utlanan sa mga lungsod sa Loboc ug Bilar.

Tinguha sa Provincial Tou­rism Office ang pagpalambo sa ORP aron mahimo nga bag-ong nature trek destination alang sa mga nature-lover ug trekker.

Ang ORP giandam alang sa nahunahunaan nga eco-tourism package sa PTO alang sa nature tour ug upland reforestation educational walk diin tudloan ang mga bisita sa lainlaing mga klase sa kahoy, unsaon ang insaktong pagtanom sa mga seedling ug ang kamahinungdanon sa forest ecosystem.

Si Camp 7 Barangay Kapitan Catalino Largo nihangyo sa mga bisita nga magpalista og una sa barangay hall ingon man sa Clonal Nursery sa di pa molahos sa lasang alang sa ilang seguridad.

Sa pagkakaron, way bayranan sa pagsud sa Osmeña Reforestation Project.

Kon panahon sa ting-uwan, li­­kayi ang pag-agi sa Manipis Road, dakbayan sa Talisay ga­­­was nga risgo ang karsada, deli­­­­ka­­do kini sa landslide ug pag­pa­­­ngaligid sa dagkong mga bato.

Mahimo ka magdala og pagkaon sa lasang, apan ayaw pag­pasagad og labay sa imong mga basura.

Likayi ang pagsabasaba sud sa lasang aron dili matugaw ang mga nilalang sa sud.

Palista daan sa barangay hall sa Camp 7 sa dili pa mo­adto sa lasang.