HANGTOD karon wa pa matino sa kampo ni Mark Magsayo kon asa na dapit ang iyang kalidad sa natad sa pamoksing.
Kini maoy rason kon nganong padayon pa ang ilang pag-istudyo ug paghashas sa ilang batos nga gihulagway sa kadaghanan nga usa sa potential nga mamahimong world champion sa umaabot nga mga adlaw.
Ang uwahing duha niya ka away, wa gihapon makakombinsi sa Ala Boxing Gym kon angay na ba kining paawayon alang sa world title sanglit wa makapakita og saktong kombati ang iyang mga kontra.
Kini kay pulos kini niya gipangtumba sulod lang sa 1st round.
Sa ato pa, sa gikatakdang 24 unta ka round sa duha niya ka away, duha ra niini ang iyang nakombatihan ibabaw sa ring.
Kini maoy butang nga naghatag og kalisod ni Ala Boxing Promoter Michael Aldeguer kon andam na ba gyud kaha si Magsayo (17-0) alang sa mga big fights.
Karong Nobiyembre 24, si Magsayo iparang sa usa ka beteranong fighter nga hapon nga gituohan nga makalahutay sa iyang away.
Si Shota Hayashi, ang pinaka-eksperiyensyado nga makontra ni Magsayo, sukad masukad maoy iyang ikaharong sa Pinoy Pride 43 nga ipahigayon didto sa Bohol Wisdom gymnasium sa Tagbilaran City alang sa iyang WBO Int’l Featherweight title.
Sa edad nga 29 anyos, ang Japanese fighter adunay 30-6-1, 18 KOs nga baraha.
Si Hayashi kinsa bag-o lang mi-knockout sa Pinoy nga si Markquil Salvana sa General Santos niadtong Septiyembre, nagpanikad nga mopasaka sa iyang international rating ug ang pagpakaging ni Magsayo maoy anaa karon sa iyang alimpatakan.
Niini, sakto ug kulbahinam nga kombati ang gipaabot nga masaksihan sa mga boxing fans sa Bohol ilabi na sa Tagbilaran City, ang lugar nga nahimugsoan sa kanhi sorbetero nga karon usa na sa mga inilang boksidor dili lang sa nasod kon dili tibuok kalibutan.
Mao usab kini ang unang higayon nga ang Pinoy Pride Boxing series mahibalik sa maong syudad sukad niadtong away ni Rey “BoomBoom” Bautista ug Genaro Garcia niadtong 2012 nga nahimong kontrobersiya.
Mopakita usab og aksyon ang laing sensational fighter nga si Albert Pagara kinsa makigsangka sa Tanzanian Mohammed “Chico” Kambuluta.
Mokompleto sa card mao ang away sa knockout artist nga si Jeo “Santino” Santisima batok sa Indonesian fighter ngta si Kichang Kim; Virgel Vitor vs. John Ray Logatiman, Melvin Jerusalem vs. Pedro Taduran; Esenth Dominggo batok Lowell Saguisa; Rocky Fuentes batok Ryan Tampus; Roli Gasca batok Jason Tinampay ug Christian Bacolod batok Ryan Makiputin. (JBM)