WAY paglubad ang kainit sa Boston Celtics sa pagpa­mupo og sunodsunod nga kadaugan ubos sa liderato ni kanhi Cleveland Cavalier Kyrie Irving.

Kagahapon, ilang gipukan ang Los Angeles Lakers, 107-96, alang ikanapulo nilang way putol-putol nga daog human sila lihi-i og duha ka pildi sa karon nga season.

Si Aron Baynes mapakatap og 21 puntos, midugang og 19 si Irving sa maong kadaugan nga nagbutang kanila sa solong liderato sa Eastern Conference standing nga may 10-2 nga baraha.

Gawas sa iyang puntos, si Baynes milangkat usab og walo ka rebounds ug tulo ka assists nga nakatapak sa haw-ang nga temporaryong nabakantihan sa pagpalta ni Al Horford kinsa wa pasudlo tungod sa gipamating labad sa ulo niini.

Wa usab makatiwas sa se­cond half ang ilang rookie nga si Jayson Tatum tungod sa gipamati usab sa tuo nga tikod.

Ang Boston nakaposte og 20 puntos sa second quarter apan nahudlat kini sa third quarter sa dihang mikupos ang ilang la­baw ngadto sa dos puntos na lang. Hinuon nibalik sa pag-inat ang bintaha di­­hang nipugdol ang open­sa sa Lakers sa fourth quarter diin nakamugna usab kini og unom ka turnovers.

Si Brandon Ingram ug ang Fil-Am nga si Jordan Clarkson nangulo sa Lakers nga may 18 puntos matag usa. Julius Randle mipaksit og 16 puntos ug 12 ka rebounds.

Daw sa nabuhi ang mainiton nga panag-ribal sa Celtics ug sa Lakers sa dihang gisu­gat og boo sa mga fans sa Celtics ang unang pagtaak sa rookie sa La­kers nga si Lonzo Ball sa TD Garden.

Ang no. 2 overall pick perming ma-boo sa ma­tag higa­yon nga siya ma­ka­ku­pot sa bola ug mitapos siya sa du­­wa nga may nuebe puntos, unom ka assists ug lima ka rebounds diin upat ray iyang nahimo sa 15 ka field goal.

Kon unsa ka kadasig ang Boston ning sayong bahin sa season, mao usab kini ang gipakita sa defending champion Golden State Warriors nga mikutlo usab sa ilang lima ka nagkutay nga daog.

Si Klay Thompson mipaksit og 28 puntos,unom niini sa three-point area, midugang og 22 puntos si Stephen Curry nga may walo usab ka assists ug walo ka rebounds aron tang­­tangan ang Minnesota Timberwolves og tango, 125-101.

Bisan wa man tuod ang ikatulo sa Big 3 sa Warriors nga si Kevin Durant, ang defending champion mipakita sa ilang kabangis ug saktong dominasyon gikan sa sinugdanan hangtod sa katapusang hut-ong sa duwa.

Balansi nga nakaduwa si Draymond Green ug miposte kinig siete puntos, unom ka rebounds, unom ka assists ug duha ka blocks. Si Durant, NBA Finals MVP, wa makaduwa tu­ngod sa bun-og sa bagtak niini.

Human sa hugot nga kom­bati sa unang duha ka kwarter, 51-50, ang Warriors misugod sa pag-arangkada sa third quarter.

Si Andrew Wiggins mihagpat og 17, samtang 16 usab ang nakutlo ni Karl-Anthony Towns ug 12 ka rebounds alang sa Timberwolves kan­sang lima ka sunodsunod nga kadaugan naputol sa maong kapildihan.

Sa laing mga duwa, ang Pistons milupig sa Indiana Pacers, 114-97; gi-magic sa Orlando ang New York Knicksw, 112-99, samtang gipamatud-an sa Miami Heat nga mas init pa sila kay sa Phoenix Suns, 126-115.