MAPATUMAN na unya sa hingpit ang Responsible and Reproductive Health Act sa higayon mopagawas na og evaluation ang Food and Drug Administration nga maoy gimando sa Korte Suprema.
Lima ka tuig sukad nahimo nga balaod ang Republic Act 10354, apan wa kini makumpleto pagpatuman gumikan sa giluwatan nga temporary restraining order sa labing taas nga hukmanan tungod kay gipausab ang implementing rules and regulations (IRR).
Sa TRO nga giisyu Hunyo 2015, ang Supreme Court nimando sa Department of Health sa temporaryo nga pagpalit, pagbaligya, pag- apudapod, pag-administer, pag-advertise ug pag-promote sa hormonal contraceptive Implanon ug Implanon NXT.
Kinatibuk-ang 51 ka contraceptives ang gi-evaluate sa FDA ug gipaabot nga moisyu kini og resolution sa dili madugay aron pagklaro sa maong mga commodity.
Kon mamatud-an nga dili makadaut o makakuha sa bata, moisyu ang FDA og certificates of product registration alang sa pagpalibkas sa TRO nga balido sud sa 40 ka buwan.
Si Dr. Herminigildo Valle, undersecretary sa Office for Field Implementation and Management sa Department of Health, niingon nga sa higayon malibkas ang TRO masugdan na ang hingpit nga pagpatuman sa RA 10354.
Siya nagtuo nga mahinungdanon ang pagpatuman sa maong balaod labi na sa programa pagpaminos sa mortality rate sa mga inahan nga mangamatay sa pagpanganak diin ang Pilipinas ang usa sa mga labing taas sa Asya.
Matod niya mahinungdanon usab nga masugdan na ang pagpatuman sa balaod tungod kay sa sunod tuig na ma-expire ang mga contraceptive nga nasakop sa programa. Ang mga eksperto sa family planning program ug practitioners nitambong sa duha ka adlaw nga 2nd National Family Planning Conference sa Waterfront Hotel sa dakbayan sa Sugbo. (SCG)