GILAUMAN nga mas mohuot pa ang trapiko sa dapit diin gitrabaho ang underpass sa dan N. Bacalso eskina F. Llamas tungod kay usa nalang ka lane ang ipagamit sa motorista sa pagsugod sa phase 2 sa proyekto karong adlawa.
Alas 6:00 sa buntag karong adlawa, gikatakda nga ipatuman sa Cebu City Transportation Office (CCTO) ang one lane sa habig sa Shopwise diin paingon lang kini sa dakbayan sa Sugbo samtang sirhan ang duha ka lane sa habig sa McDonald.
Matod sa project engineer sa Department of Public Works and Highways (DPHW) nga susama sa gihimo nila sa habig sa Shopwise, ilaha usab nga butangan na og board ug sheet piles ang habig sa McDonald’s.
“Kanang sa McDo close gyud, niya mo-detour na sila sa sa Caimito, sa Ma. Gochan ug sa Katipunan katong sa stakeholders meeting before naa man tay ang katong going to Pardo naa nay number code ako pa tong i-recall moagi na og Katipunan, naa say Basak nga moagi diri sa Ma. Gochan then ang last gyud nga detour road kining Caimito i-one way nato,” matod ni Engr. Roy Dela Cruz sa DPWH.
Giuna og trabaho sa DPWH ang habig sa Shopwise tungod kay aduna’y linya sa pikas nga habig ang Metropolitan Cebu Water District nga maapektohan sa ilang trabaho.
Katong mga sakyanan gikan sa downtown paingon sa south mamahimong moagi sa mga diversion road sama sa Katipunan, Ma. Gochan ug Caimito st., ug ang mga private vehicle, bus ug dagkong truck,sa South Road Properties.
Subay niini, ang operations head sa CCTO nga si Francisco Ouano miasoy nga gipangandaman na kini sa ilang buhatan gani aduna na silay gipamutang nga signages ingon man pagpakatap og mga traffic enforcer.
“Ipahibawo lang nato nga ablihan ang phase 2 pero one lane ray maagian dili ang three lanes one lane ra ang pwede maagian, normally ang atong mga PUJ ana nganha na gyud ta magsugod og divert kay dili maka-accommodate atong dalan kung dili nato ipa-divert,” matod ni Ouano.
Ang CCTO mosusi sa sitwasyon karong adlawa aron makita kon unsay epekto sa paggamit og usa nalang ka lane dungan sa pag-ingon nga nanawagan si Ouano sa publiko nga idumula ang ilang oras aron malikay sa kahuot sa dagan sa trapiko sa naasoy nga dapit.