NAINAT sa Alumni 1999 cagers ang ilang ikalima nga sunod-sunod nga kadaogan agi pagpilde sa Jammers 2005, 66-44, atol sa 8th XUHS-ABA Basketball Tournament niadtong Sabado, Nobyembre 4, sa Xavier University Main Campus covered courts.
Nitala si Louie “C-Webb” Roa og 16 puntos aron mangulo sa 99ers, samtang niabag sab og dako ang ilang dominanteng sentro nga si Marco Sabal agi sa 14 ka marka.
Tungod sa daug, nagkasolido ang ilang stado sa ikaupat nga pwesto nga adunay 7-8 win-loss record ug nagkahayag ang ilang tsansa makasulod sa top-4 playoffs sa St. Peter Faber Cup division.
Ug, posible pa nila maapsan ang XUHS 2000 sa kataposang duha ka dula nila nga nabilin.
Ang Batch 2000 karon naa sa ikatulo nga pwesto sa division nga adunay 6-7 card.
Nag-una lang gihapon ang Alumni 2001 sa Faber Cup division nga adunay 6-3, samtang naa sa ikaduha ang Gamba 97 nga adunay 7-7.
Sa pikas bahin, pabilin lang gihapon nag-una ang Jammers sa St. Ignatius de Loyola Cup division taliwala sa kapildehan nga adunay 10-3 card.
Sa uban nga mga dula, wala na sa kontensyon ang IAM 98 human giparot sa Batch 2006, 53-66.
Nibugkos na ang 2007 sa XUHS 2002 alang sa ikaduha nga pwesto nga parehas adunay 8-4 card sa Loyola Cup division.
Kini, human midaug ang 2007 agi sa forfeit kontra sa 2003.
Sa women’s divison, gitadyak sa 2003 ang 2005, 32-22.
Dula karon didto sa XU Main Campus:
6:45 p.m. 1998 vs 1991
6:45 p.m. 2007 vs 1996
8:15 p.m. 1993 vs 1992
8:15 p.m. 2004 vs 2005