NAKAPANGUTANA ko kon si kinsay power gyud sa PDP-Laban tungod niining pagtakda og mass oath-taking karong Nobiyembre 17 diha sa SRP.
Naa man guy gikatakdang dakong kalihokan ang maong partido sa administrasyon. Naukay na ang mga politiko ug mga grupong pro-Duterte niini bisan og wala pa kini mataho sa mga mantalaan gawas sa akong kulom sa Sun.Star Cebu.
Unsaon nga dili man sakop sa partido ang nangusog nga mahitabo kini. Unya, lakip sa gipang-pressure nga mopadala og mga tawo mao man ang mga mayor nga dili sakop sa partido.
Usa sa atong bantayanan mao kining lihok sa mga sakop sa PDP-Laban diha sa Cordova nga wala makauyon nga mosulod na sa partido si Kong. Eileen Radaza.
Wa man koy nakitang negatibo kon mobali na si Kong. Radaza karon. Usa siya ka kongresista nga dunay prinsipyo nga iyang gipakita sa mga baruganan sa pipila ka mga isyu.
Apan kuwestyon man kini sa umaabot nga politikanhong bugno sa Mactan ug Sugbo.
Una, atong mapaabot puhon nga magbangga na sab ang mga Radaza ug ang pwersa ni Sec. Addy Sitoy diha sa Mactan.
Napildi man ang grupong Kusgano sa miaging piliay, apan si Sec. Sitoy nakapasulod og usa ka konsehal diha sa Konseho sa Syudad sa Lapu-Lapu ug way nahimo si Usec Dino pagbabag niini.
Ikaduha, nakita sab nako ang pangutana kon si kinsa ang werpa, kun power, nilang Usec Mike Dino nga maoy nagpaluyo sa pagpasulod ni Kong. Radaza sa PDP-Laban ug Sec. Sitoy.
Nakita na man nako kining maong problema kadto pang nianhi si Presidente Rodrigo Roa Duterte alang sa inagurasyon sa Cordova-Cebu bridge.
Nasabtan nako nga hapit malawgaw ang programa dihang niingon kini si Usec Dino nga way labot sa programa si Mayor Tomas Osmeña ug si Sec. Sitoy na ang nihimog pagpaklaro diha sa media.
Mahinungdanon ni Sec. Sitoy ang maong taytayan kay mao unya kini magdalag dugang kalambuan sa lungsod sa Cordova. Matod pa ni Sec. Sitoy niadtong tungora, dugay na niyang damgo ang maong taytayan ug ang kalambuan sa Cordova.
Laing plantsahunon mao kining bangi sa grupong One Cebu ug si Mayor Aljun Diamante sa Tuburan.
Si Diamante, isip lider sa LMP sa Sugbo, duna say iyang mga kasangga nga mga mayor. Hugot kini sila nga kaatbang sa grupong Once Cebu nga gipangulohan ni Kong. Gwen Garcia.
Syudad sa Sugbo
Ang labing nakapa-intriga kanako mao kining taho nga atong nadawat nga usa ka lider sa PDP-Laban ang niduol og mga sakop sa BOPK aron maoy pasudlon sa partido ug dili ang mga sakop sa Team Rama.
Matod pa, di pa diay hingpit nga sakop sa PDP-Laban ang Team Rama kay wa pa sila maka-agi og Basic Membership Seminar (BMS) diin gikan sa kaulohan ang mga lecturer.
(@anol_cebu sa Twitter)