TUNGOD kay wala pa hingpit mabutangi og internet connection ang 15 ka mga buhatan sa Land Transportation Office (LTO) 7, wa pa masugdi ang pag-imprinta sa driver's license nga may lima ka tuig nga validity.
Matod ni LTO 7 OIC Regional Director Alita Pulga nga niadtong Biyernes, upat pa lang ka mga buhatan ang nabutangan og internet connection sa mga service provider.
Gikinahanglan ang connection kay ang bag-ong desinyo sa lisensiya aduna na'y biometric system ug pagkuha sa hulagway.
“So, client has to come personally to the LTO office where he/she got his/her license for the enrollment in the biometric -fingerprinting (10 fingers) and photo taking. Blood type is an additional information that must be encoded to the system,” si Pulga nagkanayon.
Kon duna nay internet connection ang mga buhatan sa LTO 7 sa mga siyudad sa Sugbo, Mandaue, Lapu-Lapu, Talisay, Tagbilaran, Dumaguete, DLRO SM City, DLRO Robinson Dumaguete City nga mao’y aduna’y daghang backlog sa lisensiya, himuon na ang pag-imprinta ug pag-isyu sa bag-ong lisensiya.