"KAHINAHUNAN at Katatagan: Tugon sa Makabago at Mapanghamong Panahon", ang napiling tema karong tuiga human sa National Consultative Workshop. Gihatagan og maayong gibug-aton ang kaimportante ug kalig-on diha sa Espiritu taliwala niining mga hagit sa panahon.
Ang buhatan sa Department of Education (DepEd) nagpahimangno sa tanang tulunghaan aron sa pagsaulog ug pagtahud sa Filipino Values Month karong bulana subay sa Presidential Proclamation No. 479, s. 1994.
Kining maong usa ka bulan nga selebrasyon nagtutok sa pagpalig-on sa atong mga kultura ug modelo nga mga kinaiya labi na sa DepEd's core values--Maka-Diyos, Maka-tao, Makakalikasan, ug Makabansa.
Tungod niini, ang tanang katawhan sa atong nasud makahatag unta og panig-ingnan diha sa pagtukod og katilingban pinaagi sa pagpuyo sa mga bili (values) aron mapabalik nato ang tinuod ug responsabling lider sa pamilya ug komunidad.
Pinaagi sa DepEd Memorandum No. 177, s. 2017 gipetsahan niadtong Oktubre 31, 2017, nga ang tanang tulunghaan, publiko ug pribado man, nagmando sa paghimo'g simple ug makahuloganon nga kalihukan aron sa pagpalapnag sa mga Filipino Values pinaagi sa exhibit, poster making, song composition, seminars ug pagpasidungog sa mga estudyante ug mga magtutudlo alang sa gipakita nga mga maayong kinaiya ug batasan.
"Bawat tao, may karapatang pantao, inherent na human dignity. Kung anuman ang nagawa ng bata, hindi natin tinitingnan yung bata sa ginawa niyang offense," matud pa sa Juvenile Justice Welfare Council (JJWC) Policy Research and Development Division Chief Atty. Maria Lourdes Fugoso-Alcain, dugang pa niya "Hindi natin siya kinakahon as magnanakaw ng pencil, mangungupit, at iba pa. Mayroon siyang nagawang mali pero mayroon pa rin siyang human rights and dignity na we have to respect, protect, and fulfill".
Sa laing bahin, ang Catholic Bishops' Conference of the Philippines (CBCP), nangaliyupo sa labaw nga makagagahum sa pag-ingon, "Lord heal our land", aron sa pagkab-ot sa tinuod nga kamatuoran, hustisya ug kalinaw alang sa pag-alim ug kaayohan sa samad sa atong nasud.
Ang atong yutang natawhan karon nag-ilaid gikan sa mga lain-laing matang sa hulga sa kinabuhi, nahimong samaran, nagdugo ug nag-antos gikan sa pagpangabuso sa tawhanong katungod, pag-usik-usik sa kinabuhi sa tawo, ma-bata man o ma-tigulang, sa adlaw man o gabii.
Dili nato malilong nga nagpadayon gihapon ang mapugsanon ug hinutdanay nga pagkutlo sa kinabuhi sa tawo nga masaksihan na lang nato ang ilang mga patay'ng lawas diha sa mga kabalayan, dalan, kalsada ug mga basurahan nga gani ang uban gibalot ang ulo niining mga packaging tapes ug ang uban gisulod sa dagko nga plastic bags.
Lord intawon, atong i-ampo, hikapa ang ilang kasing-kasing ug pasayloa sila kay wala sila kahibalo sa ilang gibuhat. Pinaagi sa Imong Espiritu, pahinumdomi sila Lord nga hunongon na ang paghunos sa kinabuhi sa uban.
"Ayaw pagpatay" mao ni ang ikalimang sugo nga hangtud karon nagpabiling buhi kining maong kasabutan diha sa Balaang Kasulatan.
Ang matag tawo gihatagan og gasa sa Ginoo, ang naghatag og kinabuhi, sa pagrason ug sa pagsabot labi na sa Iyang mga balaod sa paghigugma. Nga pinaagi sa tingog sa konsensiya sa matag tawo, isip dagway sa Ginoo, gitudloan Niya sa pagpuyo subay sa moral nga prinsipyo nga hatagan og igong gibug-aton ang pagpanalipod ug pagrespeto sa kinabuhi ug sa katungod sa pagpakabuhi.
Ngano man nga ang mga kabataan ug mga kahamtungan sa atong henerason karon nagkulang na sa paghatag og bili sa kinabuhi sa atong mga kaigsuonan?
Nganong ang pagpatay og laing kinabuhi alang nila normal na lang ug walay kalambigitan sa atong pagkadignidad?
Unsa na ka baga ang kubal sa atong konsensiya nga dili na gani makabati og kasakit o kaguol o kalooy sa isigkatawo?
"We cannot allow the destruction of lives to become normal. We cannot govern the nation by killing. We cannot foster a humane and decent Filipino culture by killing," matud pa sa sinulat ni Cardinal Luis Antonio Tagle, dugang pa niya, "As we denounce as inhuman and un-Christian an act willfully intended and planned to inflict harm or death on a human person, we call on those who harm or kill others to listen to their conscience, the voice of God that summons us to do good and avoid evil."
Ang lawom nga samad dili daling ayuhon. Molungtad kini og dugay nga panahon. Sa laktod nga pagkasulti, ang pag-alim sa samad sa atong nasud nga nigamot na dili daling mahupay. Ang una nga angay natong buhaton mao ang pagtan-aw sa tawo isip tawo nga may kinabuhi dili hayop o usa ka butang nga atong abusohan lamang.
Balik tan-awon nato kon asa ta gikan ug asa gikan ang atong kinabuhi nga naangkon niining kalibutana.
Stop killing now!
*****
Feedback/comment-09487549768