Nadela: Nagsugod na pagpamauli ang taga Marawi City

DUNA na’y mga tinun-an nga taga Marawi City ang namauli human sa lima ka bulan nga pag-eskwela dinhi sa ato. Kini maoy gipahibalo kanako ni Ma’am Carmencita Hernandez maestra sa Grade 5 sa Cebu City Central School sa niaging semana.

Matod niya duha sa iyang tinun-an ang wa na mobalik og eskwela ning bulana human sa Kalag Kalag. Nakonpirmar gikan sa mga guardian sa maong mga tinun-an nga adto na sila sa Marawi City mopadayon sa pag-eskwela.

Ang rason kay nabalik na sab ang ilang mga ginikanan didto. Sa mga pakisusi nga akong gihimo, daghang mga eskwelahan didto ang wa maapektuhi sa gubat sama niadtong nahimutang sa layo nga bahin sa city proper. Gitawag og ground zero ang usa ka bahin sa Marawi City nga maoy nagusbat sa unom ka bulan kapin nga giyera. Kanang nakita ninyo sa tele­bisyon nga nangasunog ug nagusbat nga mga estraktura mao na ang ground zero.

Hinuon, duna pa’y daghang tinun-an si Ma’am Hernandez ang magpabilin pa kay wa pa’y plano ang ilang ginikanan nga mopauli. Ang usa nga akong na-interview niingon nga nindot unta kon dinhi sa Sugbo nalang siya mopadayon sa pag-eskwela kay malinawon unya daghan na sab siya og higalang Kristiyanos.

Gihulagway niya nga mga buotan ug wa siya makasinati og diskriminasyon sukad sa iyang pag-abot niadtong Hunyo. Duna sa’y niingon nga kon mabalik man siya sa Marawi, lisod niyang makalimtan ang iyang maestra ug mga classmate nga nitabang niya unsaon pagkat-on nga maka paspas siya sa pagbasa.

Tinuod dunay daghang nindot nga kasinatian ang mga tinun-ang Muslim nga nahimong mga transferee dinhi tungod sa gubat sa Marawi.

Atong pasalamatan ang ta­nan nga nakatampo og dako aron mahimong mabulokon ug memorabli ang ilang pag­t­uon dinhi.

Pananglit, mohukom ang uban nga mopadayon sa pag-eskwela dinhi, di ba ni mahimong sabton nga kauban sa proseso sa rehabilitasyon sa Marawi?

Asa’y maayo nga pasagdaan nato sila sa ilang gusto unya suportahan sa gobyerno ang ilang pagpuyo ug pag-eskwela dinhi.

Nakasiguro ko nga kon buhaton kini sa gobyerno dunay daghan nga magpabilin kay sa magsugod na sab sila sa uno. Mga biktima sila sa gubat taliwala sa kalinghod sa ilang sa­labutan. Di sayon ang trauma nga ilang nasinati ug di paigo ang lima ka bulan pagpahibalik sa ilang normal nga kahimtang.

Sa mga tabangunon nga mga tinun-an sa tibuok nasod na­kita nako sila nga nag-una nga nanginahanglan ug pag-amuma sa gobyerno.

Siguro buhi pa sa ilang panumdoman ang nagsina­ngag nga butobuto sa armas ug bomba.