ATONG namatikdan nga nag-anam kalig-on ang relasyon sa Pilipinas tali sa China ug sa Russia, bisan pa sa paglingkod ni Presidente Rodrigo Roa Duterte ang duha ka super power nga nasud maoy iyang gibisita.
Paglingkod ni Presidente Donald Trump isip ika-46 nga presidente sa Estados Unidos wala tambongi sa atong presidente ang iyang imbitasyon didto sa Washington.
Katungod usab sa atong presidente kon asa nga Superpower nga nasud siya gustong mopasilong, ug karon, napili niya ang China ug ang Russia.
Ang atong mga igsuong Pilipino nga diehard sa America, dayon ug ingon nga wala kuno kitay utang kabubut-on sa gihimo sa America sa Pilipinas sa didto pa kita sa kamot sa mga kastila, ingon man sa dihang gusto na usab kitang ilugon sa Japan niadtong ikaduhang gubat sa kalibutan.
Speaking of utang kabubut-on, mora biya og wala na tay utang kabubut-on sa ila, una gipalit kita nila gikan sa Spania, ikaduha, ila gyud tang luwason gikan sa paghari-hari sa hapon niadtong ikaduhang gubat sa kalibutan, tungod kay bulawan man ang atong nasud sa Pilipinas alang kanila.
Sumala, gipanghakot nila ang atong mga rekursos naturales, nga maoy ilang gihimong materyales sa ilang pagka-industrial nga nasud sa kalibutan, gipatuyangan kita nila'g utang sa World Bank nga sila ang nagkontrol, baligyaan kita nila og armas nga salin pa's gubat sa Vietnam ug Korea, hangtud nga girendahan kita sa atong ekonomiya.
Sa laktud, gipahimuslan nila ang atong pagka-inosente ug pagkawalay kabangkaagan kon unsa ang pagpadagan sa gobyerno, ug ang nahitabo nahimo kitang sunod-sunoran sa ila.
Karon ang pangutana asa kitang dapita nga dako kaayo og utang kabubut-on sa ila nga sila man ang naghakot sa atong bahandi sa Pilipinas? Samtang duna pa silay matiti dili gyud ta nila biyaan.
Karon klaro ug hayag pa's udtong tutok nga mobalhin na si Presidente Rodrigo Roa Duterte og mga bag-ong kaalyaddo, ug kini mao ang China ug Russia. Pero, mao gihapon ang tumong ug tuyo nila nga mahimo kita nilang market sa industrial product.
Premiro hatag pa na, mga modernong armas, ug mga heavy equipment, apan sa ngadto-ngadto baligya na. Hinuon dibali, kay mga brand new man, dili pareha sa America nga mga salin sa nahurot ang armas nga ilang ibaligya sa ato.
Hangtud nga kon mobilib na ta sa ila, pautangon na sad ta niining duha ka nasud hangtud nga maputos kita sa utang.
Kining duha ka nasud ang Russia ug China, mora'g arang-arang ang Russia kay dii mapahimuslanon sa higayon. Ang China, samtang busy ang mga leader sa Asya sa mga summit, ug tension sa nuclear weapon sa Korean Peninsula, gipahimuslan ang kahuyang sa Pilipinas pinaagi sa pagtukod ug pagpalig-on sa ilang puwersa militar sa gikabangian sa South China Sea.
Gikompirma mismo sa atong presidente nga nagpadayon ang China karon sa pagtukod og dagkong building sa maong lugar. Kining tanan anaa na sa atong presidente kon kaya ba niyang sitahon ug sultihan ang presidente sa China nga si Xi Jinping karon sa nagpadayon nga Asean Summit dinhi sa Pilipinas.