Mongaya: Mga bangi sulod sa PDP-Laban

NAKADAOG si Presidente Rodrigo Roa Duterte sa miaging piliay bisan pa og gamay ra ang mga politiko nga nitabang kaniya.

Dinhi sa Sugbo, ang bagang bul-og sa katawhan pinangulohan sa Duterte Campaign Team ang nangusog. Gawas sa mga pro-Duterte groups nga MRRD, DCT ug uban pa diha sa miting de avance sa SRP, atong makit-an ang grupo sa “Let’s DO It” nilang Tomas ug Minnie Osmeña ug ang One Cebu nga gipangulohan nilang Winston ug Kong. Gwen Garcia.

Ang nagdala sa bandila sa PDP-Laban mao silang Jojo Di­zon, ang bana ni Lolypop Ouano, Noel Felongco, ug ang Kusgano nilang Lando Patalingjug ug Ady Sitoy niadtong tungora.

Wa gani manimaho sa Mi­ting de Avance ug adlaw sa piliay ang Bisaya na Pud ni Michael Dino kay nangadto man ang ilang core group sa Manila diin sila na-stranded.

Apan lahi ang hulagway nga atong maaninaw karong nangandam ang PDP-Laban alang sa ilang mass oathtaking karong Biyernes, Nob. 17.

Ang nangusog nga maka-mobilize og dako-dako mao kini si OPAV Dino nga di gani sakop sa PDP-Laban. Unya, wa moagi ang mga mohurar og gitawag nila nga BMS nga gimubo na man unta karon.

Di pa ko makalimot sa panahon sa diktaduryang Marcos nga kuyog ming nagmartsa sa kadalanan sa Sugbo sa mga sakop sa PDP sama nilang Inday Nita Cortes-Daluz, Tony Cuenco, Dodong Holganza ug ang iyang anak nga si Joeyboy Holganza.

Akong mahinumdoman nga mahimo kang sakop sa PDP human makaagi sa ilang Basic Membership Seminar (BMS) nga tulo ka adlaw. Karon kay pipila ka oras na lang. Atong nasayran nga dunay sobra sa libo ang nahimong sakop sa PDP-Laban sa BMS nga gipahigayon kagahapon.

Gani, di ko mahibulong nga mas daghan ang manambong nga kanhi mga Yellow kon tigsuporta sa Liberal Party ug mga kanhi tigsuporta ni Jojo Binay sa UNA.

Bisan pa man, di sab ko mahibulong kay murag nagpraktikal na man ang kadagkuan sa PDP-Laban. Mas maayo alang sa ilang preparasyon sa piliay sa Mayo 2019 nga makuha nga sakop ang mga lig-on nga politiko sama sa mga Radaza sa Mactan ug si Mayor Aljun Diamante nga lider sab sa LMP dinhi sa Sugbo.

Hinuon, kon proyekto nga i­­­ngon niini, nagkinahanglan ang PDP-Laban sa Sugbo og lig-on nga lider nga katuohan sa tanang nagkabangi nga pundok-pun­­dok. Ambot lang kon sak­­to ba nga kining dili mismo sa­­kop sa partido maoy mo-organisa.

Apan malantawan na nato ang mga pro­blema ug akong gustong mahibaw-an nga kaya ba ni OPAV Dino maplantsa nga di man siya sakop sa partido.

Gani, samtang aktibo man nga nitabang sa mga pangandam si Mayor Diamante, ang kampo ni Kong. Garcia niduso man sa kaatbang niini nga si Daphne Lagon. (@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph