KAY natawo ta sa atong pinulongan ang mga kahulogan niini dali kaayong modip-ig sa atong panabot ug motidlom sa atong kasingkasing. Kon panamastamas dali tang moulbo. Kon binastos motingkag dayon ang atong dunggan ug magsuag ang atong ginhawaan.
Di ta kabasol kon mao kini ang kalit nga gibati sa mga konsehal sa Barug Team Rama nga nakabasa sa binastos nga hashtag ni Tomas sa iyang facebook “Team Rama baho mog --lat.”
May kalabutan kini sa kanunay nilang pagbabag sa Inayawan Landfill nga nanimaho na. Ila kunong ikiha ang mayor. Kay “amahan sa siyudad nga nagbinastos ug nag- insulto sa kababayen-an.
Apan daling wa angkuna sa mayor nga siya ang nagsuwat ug iya kunong kasab-an ang iyang ingkarkado sa facebook. Sa kadaghang mosuwat niya di kanunay siyang makaatiman sa facebook.
Nangayog apology si Tomas. Apan kon ipadayon nila ang kiha ila kanang katungod. Sa unsang reklamo? Pagsupak sa Cyber laws? Ang higala kong cabinet member karon may secretary sa iyang Facebook, Twitter ug Instagram. Kay sama sa mayor busy kaayo siya.
Apan di sila makaikyas sa responsibilidad kay ilang account kon magbinuang ang sinaligan. Angayng palabyon na kini nila. Tomas has gone down already kay nangayo nag pasaylo Daghang ekspresyon nato nga makatingkag og dunggan sama sa animal ka, kulongo ka, yabagog utok, way buot, naa sa lubot ang utok, anak sa kagang, ubp. Dali ra kaayo ning yawiton sa mga Sugbuanon.
Kon hubad lang sa sex organ nga way tumong sa bagbinastos. Way reklamo sama sa akong gihimo ning lindog 19 years ago sa vagina monologue ngadto sa “bagutbot sa --lat.”
Sayri Kini. Tua na si Erma Cuizon, essayist ug post copy editor sa SunStar Cebu. An award winning fictionist, si Erma nidaog sa Philippine Free Press Short Story Contest sa ingon nakig-ampad na nilang Resil Mojares ug Renato Madrid.
Nagkaila mi sa 70’s sa diha pa siya sa Dept. of Information now PIA. At home kaayo siya sa Iningles in speaking and writing. Anak siya ni anhing city mayor Carlos Cuizon. Adios, Mam Erms!