Nalzaro: Mga balingbing

ADUNAY panultihon nga ‘kon asa tong kamay adto maghugop ug mag-ambahan ang mga sulum, hulmigas ug atitud.’ Busa dili na kita angayan pang matingala nga daghan o halos tanang mga pulitiko dinhi sa Sugbo ang motapon na ngadto sa partido sa administrasyon, ang Partido Demokratiko Pilipino-Lakas ng Bayan (PDP-Laban). Ang partido maoy kamay samtang ang mga pulitiko maoy mga sulum, hulmigas ug atitud.

Ubay-ubay nga mga pulitiko dinhi sa Sugbo apil na ang mga barangay kapitan sa Cebu City ang gikatakdang manumpa sa partido ugmang adlawa diha sa Plaza Independencia. Ang mga opposition councilors dinhi sa dakbayan nga sakop sa Barug Team Rama nga gipanguluhan ni Vice Mayor Edgardo Labella maoy mangulo sa grupo.

Si Konsehal Jun Alcover nga sakop sa oposisyon mibalibad gumikan kay kritiko man siya ni Pres. Rodrigo Duterte. Insakto usab kining nakab-ot nga desisyon ni Alcover kay morag salikwa-ot kaayo paminawon nga mobalhin siya sa PDP-Laban nga gipanguluhan sa Presidente nga kritiko man siya sa Presidente. Labaw pang dili makatapon si kanhi Mayor Mike Rama kay ang Presidente mismo ang mitumbok kaniya nga drug protector. Mao nang atong tambag aning Rama nga dili una mag-apil-apil sa pulitika hangtod nga dili pa ma-clear o malimpiyuhan ang iyang pangalan aning imahin nga drug protector.

Ang rason nganong ang mga pulitiko mo-abin man gyud sa partido sa adminis­trasyon para lang gyud sa ilang kaugalingong interes. For political convenience. Dako og makuha ang mga pulitiko kon kaalyado ka sa administrasyon sama sa mga mihuras o mga proyekto. Kay matod pa lagi nga ‘kinsa tong duol sa kusina maoy dali makakaon’.

Inig abot usa sa eleksiyon aduna silay madawat nga funding gikan sa national party nga maoy migamit kanila. Resulta pod kini sa multi-party system dinhi sa atong nasud diin dali ra kaayo magtukod og partido dili sama didto sa Estados Unidos nga duha ra gyud, ang Republican ug Democrats. Mao nang dili na lang ta matingala nga mo-balingbing kining mga pulitiko. (bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph