Kamahal sa pag-hire og developer hagit sa mga negusyante
USA ning kamahal sa pag-hire og developer nga nag-unang hagit sa mga small and medium enterprises (SMEs) ug entreprenuer sa paghimo nila og kaugalingon nga website sa ilang negosyo.
Di ikalimod nga tungod sa bag-o nga teknolohiya, ang mga malampuson nga negusyo dunay website o kaha mobile apps.
Matod ni Albert Padin, Google Developer Expert sa Symph, usa ka mobile, web design ug development studio sa nasod, nga tungod kay mas mahal ang bayad sa developer sa laing nasod, manglarga kini og adto sa laing nasod manrabaho.
Dugang ni Padin nga malaumon sila nga aduna’y mamahimong kolaborasyon sa mga negosyante ug developers aron makahimo kini og relasyon tali sa pagpalambo pa sa ilang negosyo pinaagi sa bag-o nga teknolohiya.
Karong Sabado, atol sa ikalimang tuig na sa DevFest ug GDayX sa Google Developers Group (GDG) Cebu ug Google Business Group (GBG), pagahisgutan ang “Reserve Pitching” diin usa kini ka programa nila nga mokuha sa problema nga giatubang karon sa mga SMEs ingon man hatagan kini nila og sulosyon.
“One of the highlights is the giving out og Google Mobile Web Certification,” matod ni CDG Community Manager, Shad Roi De La Cruz.
Kapin sa 1,500 ka mga partisipante ang gilauman nga motambong sa maong tinuig nga kalihokan diha sa J Centre Mall.
Lakip sa motambong kining developers, business professionals, estudyante ug tech enthusiasts.
Ang tema karong tuiga mao ang “Empowering Developers and Entrepreneurs.” (HBL)