PIPILA ka mga oras human gipasuspenso ni Lapu-Lapu City Mayor Paz Radaza ang pagpanghatag og bakuna ngadto sa Pajac Barangay Health Center, mianunsiyo ang Department of Health (DOH) 7 nga padayon ang pagpamakuna sa tanang health center lakip na usab ang nahisgutang dapit.
Kini bisan kon adunay imbestigasyon nga gihimo kalabot niadtong kamatayon sa duha ka mga masuso.
Ginikanan nila ni Ghirvaughn McReign Limpangog, tulo ka buwan, ug Ayesha Mae Suson, upat ka buwan, mibasol sa gihatag nga immunization vaccine sa barangay ug natuo nga maoy hinungdan sa ilang kalit nga kamatayon.
Giduaw ni Radaza ang haya sa duha ka mga bata kagahapon diin iyang gipahibawo ang tagtungod nga adunay imbestigasyon nga gihimo ang city attorney’s office kalabot sa hitabo.
Gisusi karon ang pamaagi nga gihimo sa barangay health worker (BHW) sa Pajac sa ilang pagpamakuna ngadto sa kabataan.
Giklaro sa mayor nga well-trained ang mga BHW sa ilang mga trabaho diha sa health center ubos sa pagdumala sa city health office.
Nakanayon ang mayor nga ang kopya nga ilang madawat gikan sa DOH 7 usahon sa buhatan sa city attorney alang sa ilang gihimong parallel investigation.
“Maka-ingon ta nga isolated case ra ni,” matod ni Radaza ngadto sa mga tigbalita.
Hayan adunay information dissemination nga himuon ang city health office kalabot niini aron nga mapasabot pag-ayo ang mga ginikinan kabahin sa paghatag og bakuna, ilabi na nga dili kalikayan niadtong nahadlok na nga magpa-immunize sa ilang mga anak.
Samtang kagahapong adlawa gilubong na si Limpangog sa sam-ang Katoliko sa Lapu-Lapu uban sa panghinaot sa iyang kabanay nga makorehi-an ang paagi sa health center aron di na masubli ang nahitabo.
Sa naunang pamahayag ni Ariel Igoy, 45, apohan ni Baby Ghirvaughn, wa silay plano nga mokiha ngadto sa hingtungdan.
Sa habig sa mga Suson ila unang hiposon ang ilang minatay nga gikatakdang ilubong karong adlawa.
Base sa death certificate nga giluwatan sa Vicente Sotto Memorial Medical Center (VSMMC) namatay ang mga bata sa Nobiyembre 11, 2017 sa 2:20 sa hapon, cause of death ni Limpangog mao ang meningitis samtang severe dehydration ang kang Suson.
Imbestigar
Giumol na sa Department of Health (DOH) 7 ang Regional Adverse Effects Following Immunization Committee (RAEFIC) aron mohimo og pakisusi kabahin sa kamatayon sa duha ka mga masuso.
Apan bisan pa sa mga pasangil, hugtanong gisalikway sa kadagkuan sa DOH 7 nga tungod sa bakuna ang kamatayon sa duruha.
Matod ni DOH 7 Regional Director, Dr. Jaime Bernadas, nga 5-man team ang RAEFIC diin pangulohan kini ni Dr. Mitzi Chua, usa ka infectious disease specialist.
Dugang ni Bernadas nga 2013 pa gigamit ang Pentavalent vaccine sa nasod diin panagang kini sa Diphteria, Pertussis, Tetanus, Hemiphilus, influenza B ug Hepatitis B.
Samtang dugay na usab nga gigamit ang Oral Polio Vaccine (OPV) sa nasod diin parehong nakapasar ang standards niini sa World Health Organization (WHO).
Gihatag kini sa mga bata nga nagpangedaron og usa, tulo ug unom ka buwan nga bata.
Ikaduha nga dose na ang parehong bakuna ug matod pa ni Dr. Rodolfo Berame, health officer sa Lapu-Lapu, “kon naa pay effect sa Pentavalent ug sa OPV vaccines, adto na unta sa 1st dose.”
Dugang ni Bernadas nga usa ning local irritation ug dili taas nga hilanat ang kasagaran nga side effect sa bakuna, apan di moabot sa seizure.