UPAT ka mga Angkas drivers ang gidakop sa taga Land Transportation Franchising and Regulatory Board (LTFRB) kay lagi illegal gyud ang ilang operasyon. Ang Angkas mga motorcycle drivers lang gihapon kini nga namasahero isip Network Transport System. Sama sa Uber ug Grab, ang mga pasahero mo-order og Angkas drivers aron kuhaon sila sa ilang gigikanan ug ihatod sa ilang destinasyon pinaagi sa mobile application.
Sa laktod pagkasulti, habalhabal ra gihapon kini. Ang nakalahi lang kuno sa Angkas ug habalhabal kay usa ra ang mosakay sa Angkas ug mailhan nimo ang driver kay pinaagi sa man sa mobile application. Unya humot kuno ang driver ug naka-uniporme. Samtang ang habalhabal, adunay duha o tulo ang mosakay. Walay klaro ang mga drivers kay dili nimo kaila. Walay lisensiya ang ubang mga drivers ug baho og singot kay dili maligo.
Pero sa operasyon, walay kalainan kay motor man gihapon ang gigamit ug gisakyan og pasahero. Pero illegal lang gihapon kay sigun sa balaod dili man puwedeng gamiton ang mga motor nga pasaheroan. Kon illegal man ang operasyon sa Angkas nganong sila ra may dakpon? Nganong dili man dakpon ang tanang habalhabal drivers? Ang mga habalhabal drivers aduna nay mga suki nga mga pasahero nga puwedeng motawag o mo-text kanila ang ilang mga kustomer.
Kining mga habalhabal nakatabang nig dako sa mga pasahero labi pa didto sa kabukiran ug sa probinsiya nga walay sakyanan. Kon aduna may mga jeep o tricycle diha lang namasahero sa lungsod o patag nga lugar. Walay mobiyahe didto sa mga barangay ug kabukiran. Habalhabal ang daghan didto. Unya ila nang ipahunong kay lagi illegal? Unsa man ang sakyanan sa katawhan?
Inay unahon kining Angkas paggukod sa taga LTFRB, mas maayo siguro nga unahon sa maong buhatan kining paggukod aning mga kolurom nga mga jeepney, buses ug vans nga nagbiyahe nga walay prangkisa. Maayo ra man god ni sila mosalida panahon sa Kalag-Kalag ug Holy Week. Pero sa ordinaryong mga adlaw, nangatulog ning mga taga LTRFB.
(bobbygnalzaro@gmail.com)