TALIWA sa kabalaka sa mga sakop sa Association of Southeast Asian Nations (Asean) kalabot sa pagtukod og mga base militar sa China sa West Philippines Sea, ang China misaad nga di makaapekto sa kagawasan sa pagbiyahe sa kadagatan ang ilang mga pasilidad.
Tanang mga nasod, matod sa lider nga si Xi Jinping, gawasnong makalawig sa kadagatan sa gikasungian nga mga isla.
Samtang gisaad kini sa China, ang pag-agi sa mga barkong igugubat sa Amerika gibabagan sa mga Insik, apan wa silay nahimo.
Kon gihimo kini sa China ngadto sa Estados Unidos nga usa ka gamhanan nga nasod, unsa na kaha sa mga nasod nga gagmay, sama sa Pilipinas?
Makapasamot sa kabalaka ang pagbutang sa China og mga armas nga panggubat, sama sa mga missile ug kanyon sa mga isla nga ilang giangkon.
Duna pa silay gibutang nga mga pasilidad alang sa mga abyon nga igugubat ug padayon silang nagpakatap og mga barko sa ilang navy ug coast guard.
Samtang naa ang kahadlok ug kabalaka, si Presidente Rodrigo Duterte nga nakighigala sa China, niingon nga siya misalig sa saad ni Xi kaniya.
Bitaw, wa man say mahimo ang Pilipinas kon moasdang batok sa China. Bisan gani ang pamunoan ni kanhi presidente Benigno Aquino III nga maoy nikiha sa Beijing sa international court, puro ra yawyaw, way buhat. Kay nakahibawo ang kanhi presidente nga way mahimo ang Pilipinas ug way kaseguroan nga molaban ang Estados Unidos kon moulbo ang gubat.
Sa pagkakaron, mas maayong mag-estorya samtang ang Pilipinas magpalig-on sa mga kahimanan sa gubat.
Kon duna nay igong kusog ang nasod nga makasamad sa China, diha, naa na kita sa posisyon sa pagpanalipod kon unsa may atoa nga naa sa West Philippine Sea.