GIBANABANANG 50,000 ngadto sa 60,000 ka mga tawo, apil ang mga mayor sa kalungsuran sa lalawigan sa Sugbo, ang manumpa sa Partido Demokratiko Pilipino–Lakas ng Bayan (PDP-Laban) karong hapon sa Plaza Independencia, dakbayan sa Sugbo.
Si House Speaker Pantaleon Alvarez ang mangu sa mass oath-taking sa alas 2 sa hapon.
Si Mike Pato, co-founder ug presidente sa Bisaya Na Pud Movement, nibutyag nga dili lang mga pulitiko ang manumpa kondili apil usab ang ordinaryo nga mga tawo nga ningpaluyo sa pagdagan ni Presidente Rodrigo Duterte sa miaging piniliay.
Matod niya daghan nang mga pulitiko nga mga Sugbuanon ang nakanumpa na sa PDP-Laban ug ang mahitabo karong hapon ang labing dako sa pagkakaron.
“Kani siya naay involvement ang mga tawo, dili lang politicians. This is a manifestation of their support sa presidente nga gusto og kausaban,” pahayag ni Pato sa pakighinabi sa Superbalita Cebu kagahapon.
Duha ang mahitabo karong hapon, una, ang basic orientation seminar sa partido ug sundan sa mass oath-taking sa bag-ong mga miyembro.
Siya nitug-an nga apil sa moitsa sa ilang suporta sa partido ang 62 ka mga barangay kapitan sa dakbayan sa Sugbo ug ang mga sakop sa One Cebu Party nga gipangulohan ni Kong. Gwen Garcia.
Una nang gibutyag ni Gobernador Hilario Davide III nga motapon sa PDP-Laban ang mga mayor sa ikaduha ug ikapito nga distrito sa Sugbo nga kanhi mga sakop sa Liberal Party sa miaging 2016 presidential elections.
Apil sa gabinete ni Duterte nga motambong sa kalihokan si Department of Energy Secretary Alfonso Cusi, Government Service Insurance System (GSIS) board of trustees member Jesus Clint Aranas ug ubang mga opisyal.
Si DavideI bukas sa posibleng koalisyon tali sa Liberal Party ug Partido ng Demokratikong Pilipino- Lakas ng Bayan (PDP-Laban) dinhi sa Sugbo apan di siya mobiya sa LP.
Sama sa gobernador, magpabilin sa usab sa ilang orihinal nga partido ang mga sakop sa Barug Alang sa Kauswagan ug Demokrasiya (BAKUD) Party, nga nakabase sa 5th district.
Lakip ang pipila ka mga board member sa probinsiya sa Sugbo sa pagtapon.
Kini sama nalang nilang Yolanda Daan ug Raul Bacaltos sa First District, nga sakop usab ni Cong. SamSam Gullas.
Hinuon, si Bokal Glenn Bercede lamang sa 6th district ang personal nga nananghid kaniya sa mga board members nga mobiya na sa LP.
Si Bercede kaalyado unta ni Davide sa Liberal Party (LP) sa sixto distrito apan nakahukom kini nga mobalhin sa administration party aron makauban ang uban pang opisyal sa 6th district ug sa Mandaue City.
Sa sixto distrito, si Consolacion Mayor Teresa Alegado nalang ang nagpabilin sa LP samtang nakatapon na sa PDP-Laban silang Mayor Luigi Quisumbing sa Mandaue, Mayor Therese Sitoy-Cho sa Cordova, Bokal Jongkie Ouano ug Kongresista Jonas Cortes. (dugang taho ni AZDL)