BAG-O lang natapus ang 31st Association of Southeast Asian Nation Summit. Kitang tanan nagtuo nga dunay mga nasud sa Western country nga tandugon ang war on drugs nga mikalas og daghang kinabuhi, nga ilang gituhoan gituyo pagpatay sa atong gobyerno.
Mas labaw kitang nasayud kon unsay gibuhat sa atong presidente kon itandi kanila, kay kaugalingon nato kining nasud. Hinuon, sa tanang mga leader nga mitambong, ang prime minister lang sa Canada ang nakaako sa pagpanguta sa atong presidente, apan personal lang nilang duha.
Mismo si US presidente Donald Trump, wala maghisgot mahitungod sa maong isyu, tungod kay dako siya'g respeto sa atong pangulo, ug kita sayud nga walay gobyerno sa Pilipinas nga nag-isponsor og patay, kon duna may namatay, kana gitawag og collateral damage o naangin lang, apan dili tinuyo.
Oposisyon maoy nakigkunsabo sa International Human Rights group aron madaut ang imahe sa administrasyon ni Duterte, nakisawsaw ang politika ug gidaut ang gobyerno nga gidumala sa atong presidente.
Respetado nga presidente si Duterte, ug midayeg kaniya ang mga dagkong leader sa mga nasud sa Asya. Gawas niini, daghan og nakab-ot ang natapus lang nga Asean Summit, trade, industry, economic ug ang seguridad sa Asean region nasilyohan.
Dako na'g kausaban ang atong nasud, nga dili na taga Luzon ang atong nahimong presidente. Mas labaw pa kining mouswag kon ang sunod nga presidente dili gihapon taga Luzon. Ug kon dili man taga Visayas, taga Mindanao gihapon.
Atong suportahan ang atong presidente para sa bag-ong nawong sa Pilipinas ngadto sa mga nasud sa kalibutan. Wala pay makahukom nga madaut ang relasyon sa Pilipinas sa America, tungod kay nakig-alayon si Presidente Duterte sa Russia ug China.
Sa buhat kitaon ug dili sa istorya. Nakita nato nga dili lang sa mga negusyante nagpabor ang iyang gobyerno kon dili ngadto sa mga masang Pilipino nga hinay-hinay nang gitubag ang ilang problema.
Dili na nato tuhoan ang prime minister sa Canada nga nakapaitok sa atong presidente, ang pagtandog sa human rights violation kuno sa Pilipinas. Ang angay buhaton sa prime minister hakuton nila pagbalik ang ilang basura nga gilabay dinhi sa Pilipinas. Unsay pagtuo nila sa Pilipinas, basurahan?